އޭޑީކޭގެ 12 މުވައްޒަފަކު ކޮވިޑް-19 އަށް ޕޮޒިޓިވް ވެއްޖެއެވެ.

ރާއްޖެޓީވީގެ ކޮވިޑް-19 ކަވަރޭޖްގައި މިކަމާއި ގުޅޭ ތަފްސީލް ހާމަކޮށް އޭޑީކޭގެ މެނޭޖިންގް ޑިރެކްޓަރ އަހުމަދު އައްފާލް ވިދާޅުވީ ޕޮޒިޓިވްވެފައިވަނީ އޭޑީކޭގެ ސަޕޯޓް މުވައްޒަފުންގެ ގޮތުގައި މަސައްކަތްކުރާ ބަޔަކު ކަމަށެވެ. އެ މީހުންނަކީ ހުޅުމާލޭގެ އެކޮމޮޑޭޝަން އެއްގައި ދިރިއުޅެމުންދިޔަ ބިދޭސީންތަކެކެވެ.

އައްފާލް ވިދާޅުވީ ޕޮޒިޓިވްވެފައިވަނީ އޭގެތެރެއިން 12 މީހުންކަމަށާއި އެމީހުންނަކީ ފްރޮންޓްލައިންގައި ޕޭޝަންޓުންނަށް ފަރުވާދޭ ބައެއް ނޫންކަމަށެވެ. އައްފާލް ވަނީ، އެ ފަރާތްތަކާއި ޕޭޝަންޓުންނާއި ކޮންޓެކްޓް ނުވާނެކަމުގެ ޔަގީންކަން އަރުވަމުން، އެ 12 މީހުންނަކީވެސް އެހެނިހެން ދާއިރާތަކުގައި މަސައްކަތް ކުރާ މީހުންކަމަށް ވިދާޅުވެފައެވެ.

މި ހާލަތާއި ގުޅިގެން އޭޑީކޭގައި އިންޓަރނަލް ޕްރޮޓޮކޯލްތަކެއް ވަނީ ގާއިމްކުރެވިފައެވެ. އެގޮތުން ބަލީގެ އަލާމާތެއް މުވައްޒަފެއްގެ ކިބައިން ފެނިއްޖެނަމަ ސާމްޕަލްތައް ނެގި ޓެސްޓް ހަދައި އެމީހާގެ ނަތީޖާ ލިބެންދެން ހުންނަން ޖެހެނީ އެކަހެރިވެގެން ގޭގައެވެ.

މި އެކޮމިޮޑޭޝަންގައި ދިރިއުޅެމުންދިޔަ ފަސް މީހެއްގެ ކިބައިން އަލާމާތްތައް ފެންނަށް ފެށުމުން، އޭޑީކޭގެ އިންޓަރނަލް ޕްރޮޓޮކޯލްގައި ވާގޮތަށް ކަރަންޓީންކޮށް އަލާމާތްތައް ހުރި ފަސް މީހުންނާއި، އެ މީހުންނާ އެކީ ދިރިއުޅެމުންދިޔަ ދިހަ މީހެއްގެ ސާމްޕަލް ވަނީ ނަގާފައެވެ.

އަލާމާތްތައް ފެނުނު ހިސާބުން، އެކޮމޮޑޭޝަން ބްލޮކްއަށް ވަދެނިކުތުން މަނާކޮށްފައި އޮތްކަން ފާހަގަކުރައްވާ އައްފާލް ވިދާޅުވީ ޖުމްލަ 15 ސާމްޕަލްގެ ތެރެއިން 12 ސާމްޕަލެއް ނެގެޓިވްވެފައިވާކަމަށެވެ. ޕޮޒިޓިވްވި 12 މީހުން އައިސޮލޭޝަން ފެސިލިޓީއަށް ގެންގޮސްފައިވާއިރު، ބާކީތިބި ފަރާތްތައް ހިމެނެނީ ކަރަންޓީނަށް ގެންދިއުމުގެ މަސައްކަތް އެޗްޕީއޭއިން އަންނަނީ ކުރަމުންނެވެ.