ގޭގައި ކުދިން ހޭދަ ކުރާވަގުތަކީ އުފާވެރި، އެކުދިންގެ ޖިސްމާނީ އަދި ނަފްސާނީ ދުޅަހެޔޮކަން އިތުރުވެގެންދާނެ ގޮތަކަށް ކަންކަން ރޭވިފައިވާ ވަގުތުތަކަށް ހެދުމަށް ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރުސީއެމް) އިން އިލްތިމާސްކޮށްފިއެވެ.

ދުނިޔޭގެ ކުޑަކުދިންގެ ދުވަހާއި ގުޅުވައިގެން އެޗްއާރްސީއެމުން ނެރުނު ބަޔާނުގައި ބުނީ މި ދުވަސް ގައުމީ ފެންވަރެއްގައި ފާހަގަކުރުމުގެ ބޭނުމަކީ ކުޑަކުދިންގެ ހައްގުތަކަށް މުޖުތަމައު ހޭލުންތެރިކޮށް، ގާނޫނީ ގޮތުން އެކުދިންނަށް ލިބިދޭ ރައްކާތެރިކަމާ އެންމެހާ ހައްގުތައް ކަށަވަރުކޮށްދިނުމަށް ބާރުއެޅުމާއި، އެ ކުދިންނަށް ބޭނުންވާ އެކަށޭނަ ތައުލީމާއި ތަރުބިއްޔަތުދީ، އަމާން ވެއްޓެއް ގާއިމްކުރުމަށް މަސްއޫލުވާ މީހުންގެ ޒިންމާ ހަނދާންކޮށްދިނުމާއި، ދުޅަހެޔޮ ސިއްހަތެއްގައި ކުޑަކުދިންނަށް ހެދިބޮޑުވެވޭނެ މާހައުލެއް ފަހިކޮށްދިނުމަށް މަސައްކަތް ކުރުން ކަމަށެވެ.

އެޗްއާރްސީއެމުން ބުނީ ކުޑަކުދިންގެ ހައްގުތައް ރައްކާތެރިކުރުމުގެ ގާނޫނީ އޮނިގަނޑު އިތުރަށް ހަރުދަނާކުރުމުގެ ގޮތުން ކުޑަކުދިންގެ ހައްގުތައް ރައްކާތެރިކުރުމުގެ ގާނޫނާއި ކުޑަކުދިންގެ އަދުލުގެ ގާނޫނަށް އަމަލު ކުރަން ފަށާފައިވާ ކަމަށެވެ. އަދި ކޮމިޝަނަށް ހުށަހެޅޭ ކުޑަކުދިންނާ ގުޅުންހުރި، މައްސަލަތަކަށް ބަލާއިރު ކުޑަކުދިންނަށް ކުރާ ޖިސްމާނީ، ނަފްސާނީ، އަދި ޖިންސީ އަނިޔާގެ މައްސަލަތަކާއި، ހަނގާކުރުމުގެ މައްސަލަތަކާ އަދި އިހުމާލުގެ މައްސަލަތައް ހިމެނޭ ކަމަށެވެ.

މިއަހަރުގެ ކުޑަކުދިންގެ ދުވަސް ފާހަގަކުރަން ޖެހިފައިވަނީ ކޮވިޑް-19 ބަލިމަޑުކަން މުޅި ދުނިޔެ ތަޙައްމަލު ކުރަމުންދާ ޙާލަތުގައިކަން ފާހަގަކޮށް އެޗްއާރްސީއެމުން ބުނީ، މަދަރުސާތަކާއި ތައުލީމުދޭ އެހެނިހެން މަރުކަޒުތައް ބަންދުކޮށްފައިވާ މިދަނޑިވަޅުގައި ދަރިވަރުންގެ އުނގެނުމުގެ ހައްގު ކަށަވަރުކުރުމަށް ދައުލަތާއި ބެލެނިވެރިން ހާއްސަ ސަމާލުކަން ދިނުން މުހިންމު ކަމަށެވެ. އަދި ގޭގައި ކުދިން ހޭދަ ކުރާވަގުތަކީ އުފާވެރި، އެކުދިންގެ ޖިސްމާނީ އަދި ނަފްސާނީ ދުޅަހެޔޮކަން އިތުރުވެގެންދާނެ ގޮތަކަށް ކަންކަން ރޭވިފައިވާ ވަގުތުތަކަށް ހަދަން ޖެހޭ ކަމަށް އެޗްއާރްސީއެމުން ބުނެއެވެ.

އެޗްއާރްސީއެމުން ބުނީ މިހަައްސާސީ ދަނޑިވަޅުގައި، ޚާއްސަ އެހީއާއި ރައްކާތެރިކަން ބޭނުންވާ ކުދިންނަށް އާއިލާއިންނާއި ދައުލަތުން ފޯރުކޮށްދޭންޖެހޭ ހައްގުތަކާއި ރައްކާތެރިކަން ކަށަވަރުކުރުމަށް ޚާއްސަ އަހައްމިޔަތުކަމެއް ދިނުމުގެ މުހިންމު ކަމަށެވެ.

އެގޮތުން، އެފަދަ ކުދިންނަށް ބޭނުންވާ ސިއްހީ އަދި އެހެނިހެން އަސާސީ ކަންކަން ފުރިހަމަ ކުރެވޭނެ ހަރުދަނާ ނިޒާމެއް ވީހާވެސް އަވަހަށް ގާއިމުކުރުމަށް އިލްތިމާސްކުރާ ކަމަށެވެ. އަދި ކުޑަކުދިންގެ ހައްގުތައް ހިމާޔަތްކޮށް ރައްކާތެރިކަން ފޯރުކޮށްދިނުމަކީ އެންމެންގެ ޒިންމާއެއް ކަމަށާއި، ކުޑަކުއްޖަކަށް އަނިޔާ ލިބޭކަން އެނގޭނަމަ ލަސްނުކޮށް އެކަން ކަމާބެހޭ ފަރާތްތަކަށް ވީހާވެސް އަވަހަށް ރިޕޯޓުކުރުމަށް އެޗްއާރްސީއެމުން ވަނީ އިލްތިމާސްކޮށްފައެވެ.

މީގެ އިތުރުން ކުޑަކުދިންނާ ގުޅުންހުރި ޚަބަރާއި މައުލޫމާތު ފެތުރުމުގައި، އެކުދިންގެ ކަރާމާތަށް އުނިކަން ނާންނާނެ ގޮތަކަށް ރިޕޯޓު ކުރުމަށް ވެސް އެކޮމިޝަނުން އިލްތިމާސްކޮށްފައިވެއެވެ.