ޓްރާންސިޓް ކަރަންޓީންގައި 300ށް ވުރެ ގިނަ މީހުން އެބަތިބިކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރުން ހާމަކޮށްފި އެވެ.
އާދީއްތަ ދުވަހުގެ ރޭ އެންއީއޯސީގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ތަރުޖަމާން މަބްރޫކް އަޒީޒް ވިދާޅުވީ، މާލެސިޓީގައި އިއުލާންކޮށްފައިވާ ލޮކްޑައުންއާއި ގުޅިގެން ތާށިވެފައިވާ 323 މީހަކު ޓްރާންސިޓް ކަރަންޓީން ފެސިލިޓީތަކަށް ގެންދެވިފައިވާކަމަށެވެ.
އެ ފަރާތްތަކަށް ރަށަށް ދެވޭނީ ކަރަންޓީން ފެސިލިޓީތަކުގައި 14 ދުވަހުގެ މުއްދަތެއް ހަމަކުރުމަށް ފަހުގަ އެވެ. މަބްރޫކް ވިދާޅުވީ، އިތުރު މީހުން ޓްރާންސިޓް ކަރަންޓީން ފެސިލިޓީތަކަށް ގެންދިއުމުގެ މަސައްކަތް ޖާގަ ހުރިވަރަކުން، ކުރަމުން ދާނެކަމަށެވެ. މަބްރޫކް ވިދާޅުވީ ސަރުކާރުގެ ވަގުތީ ބޯހިޔާވަހިކަމުގައި މިހާރުވެސް 97 ފަރާތެއް އެބަތިބިކަމަށެވެ.
މިހާރު އޮތް ޙާލަތުގައި ޚާއްޞަ ހުއްދައެއް ނެތި ރަށްރަށަށް ދަތުރެއް ނުކުރެވޭއިރު ކުރިޔަށް އޮތް 2 ހަފުތާއަކީ ބަލީގެ އެންމެ ޕީކް ދުވަސްވަރަށް ވުމާއިއެކު، ރަށްރަށަށް ދަތުރުކުރުން މި ދަނޑިވަޅަކަށް ވަނީ މަޑުޖައްސާލާފައެވެ. އެއީ މިހާރުގެ ޙާލަތުން ބަލި އެހެން ރަށަކަށް ފެތުރުނަ ނުދިނުމަށް އެޅި ފިޔަވަޅެއްކަމަށް އެންއީއޯސީން ވަނީ މީގެކުރިން ފާހަގަކޮށްފައެވެ.
