މަސައްކަތަށް ބުރޫ އެރުމެއް ނެތި ވަރަށް ރޭވުންތެރިކަމާއެކު ހުރިހާ ކަމެއް ކުރިއަށްދާ ކަމަށް މޯލްޑިވްސް އިމިގްރޭޝަނުން ބުނެފިއެވެ.

ރާއްޖެޓީވީ ކޮވިޑް-19ގެ ޚާއްޞަ ކަވަރޭޖަށް ދެއްވި އިންޓަވިއުއެއްގައި ހެޑް އޮފް އެއަރޕޯޓް އިމިގްރޭޝަން އަހްމަދު ވަހީދު ވިދާޅުވީ އިމިގްރޭޝަންގެ ހުރިހާ މަސައްކަތްތަކެއް ވެސް ވަރަށް ރޭވުންތެރިކަމާއެކު ކުރިއަށްދާ ކަމަށެވެ. ވަހީދު ވިދާޅުވީ ކޮވިޑް-19ގެ މިދަނޑިވަޅުގައި މަސައްކަތް ކުރަނީ މިއީ ގައުމީ މަސައްކަތެއް ކަމުގައި ދެކެގެން ކަމަށާއި، ގިނަ ބައެއްގެ އެއްބާރުލުން ލިބޭ ކަމަށެވެ.

ވަހީދު ވިދާޅުވީ އަބަދުވެސް ޑިއުޓީގައި މުއައްޒަފުން ތިބޭ ކަމަށެވެ. ކާގޯ ފްލައިޓްތަކުގެ ކްލިއަރެންސް އާއި އެރައިވަލް ޑިޕާޗަރ ދޭންޖެހޭކަން ފާހަގަކުރައްވައި ވަހީދު ވިދާޅުވީ އޮޕަރޭޝަންއަށް ބުރޫ އަރާ އެއްވެސް ކަމެއް ނުހިނގާ ކަމަށާއި، ޑިއުޓީއަށް މުވައްޒަަފުން އައުމުގައި ފުލުހުންގެ ފުރިހަމަ އެހީތެރިކަން ލިބެމުންދާ ކަމަށެވެ.

ވަހީދު ވިދާޅުވީ ކޮވިޑް-19ން ރައްކާތެރިވުމަށް ގިނަ ފިޔަވަޅުތަކެއް އަޅާފައިވާ ކަމަށާއި، ޚާއްސަކޮށް އިމިގްރޭޝަން މުއައްޒަފުންގެ ސަލާމަތާއި ރައްކާތެރިކަމަށް އިސްކަންދޭ ކަމަށެވެ.