މެލޭޝިޔާގައި ދިވެހިން ދިރިއުޅޭ ސަރަހައްދުތަކުގެ ހޮސްޕިޓަލްތަކުން އާސަންދަގެ މެރެނާ ސްކީމް ލިބޭނެގޮތް ހަމަޖައްސައިފި އެވެ.

ކޮވިޑް-19އާ ގުޅިގެން މެލޭޝިއާގައި އެއްތަނުން އަނެއްތަނަށް ދިއުމަށް އަޅާފައިވާ ހުރަސްތަކުގެ ތެރެއިން އެމީހަކު ދިރިއުޅޭ ތަނުން ފެށިގެން 10 ކިލޯމީޓަރަށް ވުރެ ދުރަށް ދަތުރުކުރުންވަނީ މަނާކޮށްފަ އެވެ.

އާސަންދައިން ބުނީ މެރަނާ ސްކީމްގެ ދަށުން ޚިދުމަތް ދިނުމަށް ލިސްޓްކޮށްފައިވާ މަރުކަޒަކަށް ދިއުމަށް ބައެއް ފަރާތްތަކަށް ދަތިވާނެކަމަށް ބެލެވޭތީ، މިހާލަތުގައި، މެލޭޝިޔާގެ ދިވެހިން އުޅޭ ސްޓޭޓްތަކުގެ ކްލިނިކްތަކާއި ހޮސްޕިޓާތަކަކީ މެރަނާ ސްކީމްގެދަށުން ޚިދުމަތް ހޯދިދާނެ ތަންތަން ކަމުގައި ހެދުމަށް އެ ކުންފުނިން ނިންމާފައިވާ ކަމަށެވެ.

މެލޭޝިއާގައި ދިރިއުޅޭ ދިވެހި ރައްޔިތުންގެ ތެރެއިން މެރަނާ ސްކީމްގައި ރެޖިސްޓަރ ކޮށްފައިވާ ފަރާތްތަކަށް، ސްކީމްގެ ޚިދުމަތް ފޯރުކޮށްދެމުން ދިޔައީ ކުންފުނީގައި ލިސްޓްކޮށްފައިވާ ހޮސްޕިޓާތަކާއި ކްލިނިކްތައް މެދުވެރިކޮށެވެ.

އާސަންދައިން ބުނީ މެރަނާ ސްކީމްގެ ދަށުން ޚިދުމަތް ދިނުމަށް އެންލިސްޓްކޮށްފައިވާ ހޮސްޕިޓަލެއް ނުވަތަ ކްލިނިކެއް ނެތްނަމަ، ބޭނުންވާ ޚިދުމަތް ރަގަޅު އަގެއްގައި ލިބެންހުރި އެހެން ޞިއްޙީ ޚިދުމަތްދޭ މަރުކަޒަކުން ޚިދުމަތް ހޯދައި، ޚިދުމަތް ހޯދިކަން އެނގޭނޭ ލިޔުންތަކާއެކު، ބިލް ހުށަހެޅުމުގެ ފުރުސަތު ހުޅުވާލާފައިވާކަމަށެވެ.