މާލެ ލޮކްޑައުން ހަރުކަށި ކުރުމާއި ގުޅޭގޮތުން ދައުރުވަމުންދާ ވައިބަރ މެސެޖްތަކަކީ އެއްވެސް ހަޤީގަތެއް ނެތް ވާހަކަތަކެއް ކަމަށް ނެޝަނަލް އިމަޖެންސީ އޮޕަރޭޝަން ސެންޓަރ އިން ބުނެފިއެވެ.
ހޮނިހިރު ދުވަހުގެރޭ އެންއީއޯސީގެ ފަރާތުން ބޭއްވި ނޫސްވެރިންގެ ބައްދަލުވުމުގައި ތަރުޖަމާން މަބްރޫކް އަޒީޒް ވިދާޅުވީ މާލޭގެ ލޮކްޑައުން އިތުރަށް ހަރުކަށިކޮށް، ގެއިން ނުނިކުމެވޭގޮތް ހަދާ، ޑެލިވަރީ ހުއްޓާލާ އަދި ހުރިހާ ފިހާރައެއް ބަންދުކުރުމަށް ނިންމާފައިވާކަމަށް ލިޔެ މެސެޖެއް ދައުރުވަމުންދާ ކަމަށެވެ. އަދި މިއީ އެއްވެސް ހަޤީތަތެއް އޮތް ވާހަކައެއް ނޫން ކަމަށް މަބްރޫކް ވިދާޅުވި އެވެ.
މަބްރޫކް ވިދާޅުވީ މި އަންނަ ސާރޖަށް ތައްޔާރުވުމުގެ ގޮތުން ލޮކްޑައުންގެ ހާލަތު ގެންނަންޖެހޭ ވަރަށް މިހާރު ވަނީ ގެނެވިފައި ކަމަށާއި އިތުރަށް ފިޔަވަޅު އެޅުމުގެކުރިން ދައުރުކުރާ މިސްރާބު އެސެއްކުރާނެ ކަމަށެވެ. އަދި އެފަދަކަމެއް ކުރުމުގެ މަޝްވަރާއެއް ސަރުކާރުން ކޮށްފައި ނުވާކަމަށްވެސް މަބްރޫކް ވިދާޅުވިއެވެ.
ދައުރުވަމުންދާ މި ފޭކް މެސެޖާއި ގުޅިގެން ގިނަބައެއްގެ ކަންބޮޑުވުމާއި ޝަކުވާ ލިބެމުންދާ ކަން މަބްރޫކް ވަނީ ފާހަގަ ކުރައްވާފައެވެ.
