މާލެ ސަރަހައްދުގައި ކޮވިޑް-19 ރޯގާ ފެތުރެން ފުށުމާއެކު، މާލެ ސަރަހައްދު ލޮކްޑައުން ކުރުމުން، މިހާތަނަށް ލޮކްޑައުން އަމުރާ ހިލާފުވި 3064 މީހަކު ޖޫރިމަނާ ކޮށްފައިވާ ކަމަށް ފުލުހުން ބުނެފި އެވެ.

ފުލުހުން ބުނީ، ލޮކްޑައުން އަމުރާ ހިލާފުވެގެން، މާލެއިން 2639 މީހަކު ޖޫރިމަނާކޮށްފައިވާ ކަމަށެވެ. އެއީ ހުޅުމާލެއިން 353 މީހަކު އަދި ވިލިމާލެއިން 72 މީހަކު ޖޫރިމަނާ ކޮށްފައިވާ ކަމަށެވެ. ހުކުރު ދުވަހު އެކަނިވެސް މާލެ ސަރަހައްދުން 220 މީހަކު ޖޫރިމަނާކޮށްފައިވާ ކަމަށް ފުލުހުން ބުނެއެވެ.

މީގެއިތުރުން ފުލުހުން ބުނީ، ލޮކްޑައުންއާ ހިލާފުވެގެން، މިހާތަނަށް 171 މީހަކު ހައްޔަރުކޮށްފައިވާ ކަމަށެވެ. އެއީ މާލެއިން 155 މީހަކާއި ހުޅުމާލެއިން 14 އަދި ވިލިމާލެއިން ދެ މީހަކު ހައްޔަރުކޮށްފައިވާ ކަމަށް ފުލުހުން ބުނެއެވެ. އަދި ހުކުރު ދުވަހު އެކަނިވެސް މާލެ ސަރަހައްދުން 9 މީހަކު ހައްޔަރުކޮށްފައިވާ ކަމަށް ފުލުހުން ބުނެއެވެ.

ކޮވިޑް-19 މާލެ ސަރަހައްދުގައި ފެތުރެން ފެށުމާއެކު މިދިއަ އޭޕްރީލް 15 ވަނަ ދުވަހުން ފެށިގެން މާލެ ސަރަހައްދު ވަނީ ލޮކްޑައުން ކޮށްފަ އެވެ. މާލެ ސަރަހައްދުގެ އިތުރުން ރާއްޖޭގެ ބައެއް ރަށްރަށުން ވެސް ކޮވިޑް-19 އަށް ޕޮޒިޓިވްވާ މީހުން ދަނީ ފެންނަމުން ނެވެ. އަދި ރާއްޖޭގެ އެކި ސަރަހައްދުތަކުން އެކި ތައްތަން މޮނީޓަރިންގ ހާލަތަށް ގެނެސްފައިވެއެވެ. އޭގެ ތޭރޭގައި ބައެއް ރަށްތަށް ވެސް ހިމެނެއެވެ.

ކޮވިޑް-19 ރާއްޖޭގައި ފެތުރުން ކޮންޓްރޯލް ކުރުމަށް ދައުލަތުގެ 46 އިދާރާއެއް ގުޅިގެން އުފައްދާފައިވާ ނޭޝަނަލް އިމަޖެންސީ އޮޕަރޭޝަން ސެންޓަރުން ލަފާކުރާ ގޮތުގައި، ހިނގަމުންމިދާ ހަފްތާއާއި އަންނަ ހަފްތާގައި ޕޮޒިޓިވްވާ މީހުން އިތުރުވުމަކީ އެކަށީގެންވާ ކަމެއް ކަމަށެވެ.

އެހެންކަމުން ކަމާބެހޭ ފަރާތްކުން ވަނީ ރައްކާތެރި ފިޔަވަޅުތަކާއެކު، އިޖުތިމާއީ ރައްކާތެރިކަމާއެކު އުޅުމަށް ނަސޭހަތްތެރި، އަދި ގޭގައި މަޑުކުރުމަށް އިލްތިމާސްކޮށްފަ އެވެ.

ރާއްޖޭގައި މިހާތަނަށް 744 މީހަކު ކޮވިޑް-19 އަށް ޕޮޒިޓިވް ވެފައިވެއެވެ.