ކ. މާލެ
|
8 މެއި 2020 | ހުކުރު 19:25
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން މިނިސްޓަރު އަމީރު
ބުރާސްފަތި ދުވަހު ބޭއްވި ނޫސްވެރިންގެ ބައްދަލުވުމުގެ ތެރެއިން މިނިސްޓަރު އަމީރު
ރައީސް އޮފީސް
ޓެންޑަރިންގެ މަސައްކަތްތައް ކުރިއަށްދާ ގޮތް
ޓެންޑަރ ބޯޑުން މަސައްކަތް ކުރަނީ ވަރަށް މިނިވަންކަމާއެކު: ފިނޭންސް މިނިސްޓަރު
މަސައްކަތް ކުރަނީ ދެފުށް ފެންނަ ނިޒާމަކުން
ރައްޔިތުންގެ އިތުބާރު ވަރަށް މުހިންމު
އެސީސީއަށް ފުރިހަމަ އެއްބާރުލުން ދޭނަން

ފިނޭންސް މިނިސްޓްރީގެ ޓެންޑަރ ބޯޑުން މަސައްކަތް ކުރަނީ ވަރަށް މިނިވަންކަމާއެކު ކަމަށާއި، އެއްވެސް ފަރާތެއްގެ ނުފޫޒެއް ނުފޯރާނެ ކަމަށް ފިނޭންސް މިނިސްޓަރު އިބްރާޙިމް އަމީރު ވިދާޅުވެއްޖެއެވެ.

ބުރާސްފަތި ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި މިނިސްޓަރު އަމީރު މިހާތަނަށް ސަރުކާރުން މަސައްކަތް ކުރަމުން އައީ ޒީރޯ ޓޮލަރެންސް ޓު ކޮރަޕްޝަންގެ ދަށުން ކަމަށާއި، ކުރިއަށް އޮތްތަނުގައި ކޮރަޕްޝަނަށް މަގުފަހިވާ ގޮތަށް އެއްވެސް ކަމެއް ކުރުމުގެ ފުރުސަތު ނުދޭނެކަމަށެވެ.

ފިނޭންސް މިނިސްޓްރީގެ ޓެންޑަރިންގެ އުސޫލުން ހުރިހާ ކަންކަމަށް ޗެކިން އެންޑް ބެލެންސިން ނިޒާމެއް އޮންނަކަން ފާހަގަކުރައްވައި މިނިސްޓަރު އަމީރު ވިދާޅުވީ ޓެންޑަރ ބޯޑު ވަރަށް މިނިވަންކަމާއެކު މަސައްކަތް ކުރަމުންދާ ކަމަށެވެ. އަދި ޓެންޑަރގެ މަސައްކަތްތަށް އެއްވެސް ވަރަކަށް ބަސް ނުބުނާކަން މިނިސްޓަރު ފާހަގަކުރެއްވިއެވެ.

ޓެންޑަރ ކުރެވޭ ޕްރޮޖެކްޓްތަކާއި، އެއީ ކޮން ސިޔާސީ ޕާޓީއަކަށް ނިސްބަވްވާ މީހުންތޯއާ ވެސް ނުބަލާ ކަމުގެ ޔަގީންކަން މިނިސްޓަރު ދެއްވިއެވެ. އަދި ވިދާޅުވީ އެމަސައްކަތްތައް ކުރިއަށް ދަނީ ދެފުށް ފެންނަ ނިޒާމަކުން ކަމަށެވެ.

އަޅުގަނޑުމެން އައިސްފައި އަޅުގަނޑުމެންވާނީ ފިނޭންސް މިނިސްޓްރީން ޓެންޑަރ ކޮށްގެން އެވޯޑް ކުރެވޭ ޕްރޮޖެކްޓްތަކުގެ ތަފްސީލްތައް ވެސް ހުށަހަޅާފައި. އަދި ކުރިއަށް އޮތްތާގައި އަޅުގަނޑު ގަސްތުކުރަނީ އެވޯޑް ކުރެވޭ ޕްރޮޖެކްޓްތަކުގެ އެވޯޑް ޝީޓް ސަރމަރީއެއް ވެސް ފިނޭންސް މިނިސްޓްރީގެ ވެބްސައިޓްގައި ޝާއިއުކުރަން.
ފިނޭންސް މިނިސްޓަރު އިބްރާޙިމް އަމީރު

ކޮވިޑް-19އާ ގުޅިގެން ކުރެވޭ މަސައްކަތްތަކަށް އަލިއަޅުއްވާލައްވާ މިނިސްޓަރު އަމީރު ވިދާޅުވީ ކުރާ ހުރިހާ މަސައްކަތްތަކެއްގައި ވެސް ރައްޔިތުންގެ އެއްބާރުލުމާއި، އިތުބާރު ބޭނުންވާ ކަމަށެވެ. އަދި މިނިސްޓްރީން ރައްޔިތުންގެ އިތުބާރު ގެއްލޭ ފަދަ ގޮތަކަށް އަމަލުނުކުރާނެ ކަމަށް މިނިސްޓަރު ވިދާޅުވި އެވެ.

މިނިސްޓަރު އަމީރު ވިދާޅުވީ އެންޓި ކޮރަޕްޝަން ކޮމިޝަން (އޭސީސީ)އަށް ހުށަހެޅޭ ހުރިހާ މައްސަލައަކީ ކޮރަޕްޝަން އޮވެގެން ހުށަހެޅޭ މައްސަލައެއް ނޫން ކަމަށެވެ. އަދި އެސީސީ މައްސަލަ ތަހުގީގު ކުރުމަށްފަހު ގޮތް ނިންމާނެ ކަމަށް ވެސް މިނިސްޓާރު ވިދާޅުވިއެވެ. އަދި ވިދާޅުވީ ކޮމިޝަނުން ކުރާ ކޮންމެ ތަހުގީގަށް ފުރިހަމަ އެއްބާރުލުން ދޭނެ ކަމަށެވެ.

- ކޮމެންޓް