ކޮވިޑް-19 އަށް ފަރުވާދެމުން އަންނަ މީހުންގެ ތެރެއިން އިތުރު 2 މީހަކު ބަލިން ފަސޭހަވެއްޖެއެވެ.

އަންގާރަ ދުވަހުގެ ރޭ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ، މިއަދުގެ މިހާތަނަށް 9863 ސާމްޕަލެއް ނެގިފައިވާކަމަށާއި އޭގެތެރެއިން 573 މީހަކު ކޮވިޑް-19 އަށް ޕޮޒިޓިވް ވެފައިވާކަމަށެވެ.

ނަތީޖާ ނުލިބި 477 ސާމްޕަލެއް ވާކަން ފާހަގަކުރައްވައި މަބްރޫކް ވިދާޅުވީ، 549 މީހުންނަށް މިވަގުތު ކޮވިޑް-19 އަށް ފަރުވާދެމުންދާކަމަށެވެ. އަދި އޭގެ ތެރެއިން އިތުރު 2 މީހަކު ބަލިން ފަސޭހަވެ، ޖުމްލަ 20 މީހަކު ރަނގަޅުވެފައިވާކަމަށް މަބްރޫކް ވިދާޅުވި އެވެ.

ޖުމްލަ 20 މީހަކު ބަލިން ފަސޭހަވެފައިވާއިރު، ދުނިޔޭގެ އެކި ކަންކޮޅުތަކުގައިވެސް ބަލިން ފަސޭހަވިކަމުގައިވިޔަސް، އަނެއްކާވެސް ކޮވިޑް-19 އަށް ޕޮޒިޓިވް ވާކަމަށް ރިޕޯޓުކުރެ އެވެ.

މިކަމާއި ގުޅިގެން ރާއްޖޭގެ ޑޮކްޓަރުންގެ ޓީމުން ވަނީ ޑަބަލް ނެގެޓިވްވިކަމުގައިވިޔަސް އިތުރު ޓެސްޓެއް ހެދުމަށްފަހު ނޫނީ އެމީހަކު ދޫކޮށްނުލާނެ ކަމަށް ވިދާޅުވެފަ އެވެ. މީގެ ކުރިން މަބްރޫކް ވަނީ ރޯގާގެ އަލާމާތް ބޮޑަށް ހުރި މީހަކު ކަމުގައި ފާހަގަވާނަމަ، އެމީހަކު ދޫކުރުމަށް ހަމަޖެހިފައިވަނީ އިތުރަށް ތަހުލީލުކުރުމަށް ފަހުގައިކަމަށް ވިދާޅުވެފަ އެވެ.