ކޮވިޑް-19ގެ ލޮކްޑައުން ގޭގައި ތިބެގެން ޅެން ހަދަން ދަސްކުރަން ޝައުގުވެރިވާ މީހުންނަށް އެފުރުސަތު ދިވެހި ބަހުގެ އެކަޑަމީން ހުޅުވާލައިފިއެވެ.

ބަހުގެ އެކަޑަމީން ބުނީ އޮންލައިންކޮށް ޅެން ހަދަން ދަސްކޮށް ދިނުމުގެ ކިލާހެއް ކުރިއަށް ގެންދަން ހަމަޖެހިފައިވާ ކަމަށެވެ. އަދި މިކޯހަކީ އާންމުކޮށް ހުޅުވައިލައިގެން ހުރިހާ އުމުރު ފުރަޔަކަށް ވެސް ބައިވެރިވެވޭނެ ގޮތަށް ފަރުމާ ކޮށްފައިވާ ކޯހެއް ކަމަށެވެ.

ބަހުގެ އެކަޑަމީން ބުނީ 15 މެއިން ފެށިގެން މިކޯސް ކުރިއަށް ގެންދަން ނިންމާފައިވާ ކަމަށެވެ. އަދި ކޯހުގެ މުއްދަތަކީ 20 ގަޑިއިރު ކަމަށް އެކަޑަމީން ބުނެއެވެ.

ހުރިހާ އުމުރަކަށްވެސް ހުޅުވާލާފައިވާ މިކޯހުގެ ޖާގަ ދޭން ނިންމާފައިވަނީ 25 މީހުންނެވެ.

މިކޯހުގައި ބައިވެރިވާން ޝައުގުވެރިވާ މީހުން މުއްދަތު ހަމަނުވާ އައިޑީކާޑުގެ ފޮޓޯއެއް، މި މަހުގެ 10 ވާ އާދީއްތަ ދުވަހުގެ 14:00ގެ ކުރިން ވައިބަރ މެދުވެރިކޮށް އެކެޑަމީގެ ނަންބަރު 7986230ށް ފޮނުވުމަށް އެދިފައެވެ.

މިއީ އޮންލައިންކޮށް ހިންގަން ހަމަޖެހިފައިވާ ކޯހެއް ކަމަށް ވާތީ ކޯހުގައި ބައިވެރިވާން ވާނީ އެ ފަދަ ވަސީލަތެއް މެދުވެރިކޮށް އުނގެނުމުގެ ފަހިކަން ހުރި މީހުން ކަމަށް ވެސް އެކަޑަމީން ބުނެފައިވެއެވެ.