ކޮވިޑް-19އަށް ތަހުލީލުކުރުމަށް ސާންޕަލްތައް ޓެސްޓު ނުކުރެވި ލަސްވާތީ ބައެއް ފަހަރު ސާންޕަލްތައް ނުނަގާ މަޑުކޮށްލަން ޖެހޭކަމަށް ކޮވިޑް-19 ޓާސްކްފޯސްގެ ތަރުޖަމާނު މަބްރޫކު ޢަޒީޒް ވިދާޅުވެއްޖެއެވެ.
އަންގާރަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވީ ޕޮޒިޓިވް ކޭސްއަކާ ގުޅިގެން އައިސޮލޭޓް ކުރެވޭ ތަނެއްގައި، ކޮންޓެކްޓުންގެ ގޮތުގައި ފެންނަ މީހުން ޓެސްޓްކުރުން އެއްވެސް އިރެއްގައި މަޑު ޖައްސާލާފައި ނުވާނެކަމަށެވެ.
ކޮވިޑް-19އަށް ޓެސްޓު ކުރުމުގެ މަސައްކަތްތައް ކުރިއަށްދާކަން މަބްރޫކް ފާހަގަކުރެއްވިއެވެ. ނަމަވެސް ބެކްލޮގްވީމަ ސާންޕަލްތައް ކްލިއަރ ވަންދެން މަޑުކޮށްލަން ޖެހޭކަމަށް މަބްރޫކް ވިދާޅުވިއެވެ.
އެކްޓިވް ސާންޕަލިން އަޅުގަނޑުމެން ރޭގައި ދެންނެވިން 200ށްވުރެ ގިނަ ސާންޕަލްތައް ނެގިފައިވާ ކަމަށް. އެކަން އަނެއްކާ ވެސް ބާރަށް ކުރިއަށް އެބަދޭ.ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް
1000 ވަރަކަށް ސާންޕަލް ބެކްލޮގްވީމަ އަނެއްކާ ވެސް ސާންޕަލްތައް ކްލިއަރ ވަންދެން މަޑު ކޮށްލަންޖެހޭކަން ފާހަގަކުރައްވައި މަބްރޫކް ވިދާޅުވީ، ކްލިއަރވުމާއެކު އަނެއްކާ ވެސް އާދައިގެ މަތިން ސާމްޕަލް ނެގުމުގެ މަސައްކަތް ކުރިއަށްގެންދާ ކަމަށެވެ.
