ޤައުމުގެ ހަމަޖެހުމާއި އިންސާފު ކަށަވަރުކުރުމަށްޓަކައި މިނިވަން ނޫސްވެރިކަމެއް އޮތުން މުހިއްމު ކަމަށް ޕޮލިސް ކޮމިޝަނަރ މުޙައްމަދު ޙަމީދު ވިދާޅުވެއްޖެއެވެ.
ދުނިޔޭގެ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތުގައި ނެރުނު ބަޔާނެއްގައި ސީޕީ ޙަމީދު ވިދާޅުވީ ޤައުމުގެ ހަމަޖެހުމާއި، އިންސާފާއި، އިންސާނީ ޙައްޤުތައް ކަށަވަރުކުރުމަށްޓަކައި ނޫސްވެރިކަމުގެ މިނިވަންކަން އޮތުމަކީ ވަރަށް މުހިއްމުކަމެއް ކަމަށެވެ.
ސީޕީ ޙަމީދު ވިދާޅުވީ މިނިވަން ނޫސްވެރިކަން ކަށަވަރުކުރުމަށް ކުރަންޖެހޭ ކަންކަން ކުރުމުގައި ފުލުހުން ދެމިތިބޭނެ ކަމަށެވެ. އަދި ޞައްޙަ ޚަބަރު ރައްޔިތުންނާ ހަމަޔަށް ފޯރުކޮށްދީ، ނޫސްވެރިން ޤައުމަށް ކުރަމުންދާ ޚިދުމަތަށް ސީޕީ ވަނީ ޝުކުރުއަދާކުރައްވާފައެވެ.
ސީޕީ މިހެން ވިދާޅުވެފައިވާއިރު ފުލުހުންގެ ފަރާތުން އެކަށީގެންވާ މިންވަރަށް މިހާރުވެސް މަޢުލޫމާތު ނުލިބޭކަމަށް ގިނަބަޔަކު ދަނީ ބުނަމުންނެވެ. އެގޮތުން، ފުލުހުންގެ ފަރާތުން މަޢުލޫމާތު ހޯދުމަށް އުނދަގޫކަމަށް ވެސް އެފަރާތްތަކުން ބުނެއެވެ.
މީގެ ކުރިން، ރައީސް ޔާމީނުގެ ވެރިކަމުގައި ރާއްޖޭގެ މިނިވަން މީޑިއާތަކަށް އެތައް ގޮންޖެހުންތަކާއި ކުރިމަތިލާންޖެހުނެވެ. އެގޮތުން އޭރުގެ އިދިކޮޅުން ކުރި މުޒާހަރާތައް ކަވަރ ކުރުމަށް ޙަރަކާތްތެރިވި ނޫސްވެރިންނަށް ހަމަލާދީ، ނޫސްވެރިކަން ކުރުމަށް ފުލުހުން ހުރަސްއެޅިއެވެ. ނޫސްވެރިންނަށް ހަމަލާދީ، އެމީހުން ގެންގުޅުނު ތަކެއްޗަށް ގެއްލުން ދީ ހައްޔަރަށް ވެސް ގެންގޮސްފައިވެއެވެ.
