އިންދިރާ ގާނދީ މެމޯރިއަލް ހޮސްޕިޓަލް (އައިޖީއެމްއެޗް) ގައި އިމަރޖެންސީ އެއްވެސް އޮޕަރޭޝަނެއް ހުއްޓާލާފައިނުވާ ކަމަށް އެހޮސްޕިޓަލްގެ މެޑިކަލް ޑައިރެކްޓަރ ޑރ. އަލީ ނަޒީމް ވިދާޅުވެއްޖެއެވެ.
ހޮނިހިރު ދުވަހު ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި، ޑރ. ނަޒީމް ވިދާޅުވީ އިމަރޖެންސީ އޮޕަރޭޝަންތައް ހުއްޓާލިކަމަށް ފަތުރަމުންދާ ވާހަކައަކީ ޙަޤީޤަތާ ޚިލާފު ވާހަކަތަކެއް ކަމަށެވެ.
ޑރ. ނަޒީމް ވިދާޅުވީ އިމަރޖެންސީ ސަރޖަރީތައް ކުރިއަށްދާނެ ކަމަށާއި، އެއީ ހުއްޓޭނެ އެއްޗެއް ނޫން ކަމަށެވެ. އަދި ވިދާޅުވީ ސެމީ-އިމަރޖެންސީ ސަރޖަރީތައް ވެސް ކުރިއަށްދާ ކަމަށެވެ.
ދެން ސެމީ އިމަރޖެންސީ ވެސް ބައެއް ފަހަރު ތި ވިދާޅުވާ ގޮތަށް ކެންސަރުގެ ބައެއް ކަހަލަ އޮޕަރޭޝަންތައް ފަހަރެއްގައި އެއީ ވަރަށް އަވަހަށް ކުރަންޖެހިދާނެ އޮޕަރޭޝަންތަކެއް. އެހެންވަންޏާ ކުރެވޭ ގޮތަށް އޮންނާނީ. އެހެން ނޫން އިމަރޖެންސީ ސަރޖަރީއެއް ހުއްޓުމެއް ނާންނާނެ. ކޮންމެހެން ކުރަންޖެހޭ ސަރޖަރީތައް އެބަ ކުރިއަށްދޭ. އެހެންނޫން ރޫޓިން ސަރޖަރީސް ޢާންމުކޮށް އިލެކްޓިވްކޮށް ޓައިމް ކަނޑައަޅާގެން މިހެން ވަކި ނިންމާ ސަރޖަރީތައް މިވަގުތު ހަމަ މެދުކަނޑާލާފައި އެހުރީ.ޑރ. އަލީ ނަޒީމް
ޑރ. ނަޒީމް ވިދާޅުވީ ބައެއް ކަހަލަ ސަރޖަރީސްތަކަކީ އޭގެ ބާވަތުން ލަސްވާނަމަ، ބަލިމީހާގެ ފުރާނައަށް ގެއްލުން ވެދާނެ ނުވަތަ ބަލި އިތުރަށް ބޮޑުވެދާނެ އޮޕަރޭޝަންތަކެއް ކަމަށެވެ. އެބާވަތުގެ އޮޕަރޭޝަންތައް ލަސް ނުކޮށް ކުރަމުން އަންނަކަމަށް ޑރ. ނަޒީމް ވިދާޅުވިއެވެ.
