އިންދިރާ ގާނދީ މެމޯރިއަލް ހޮސްޕިޓަލް(އައިޖީއެމްއެޗް) ގައި މިހާރު އޮތީ އެންމެ ފަސް އެމްބިއުލާންސް ކަމަށާއި، ޑިމާންޑް ވަރަށް ބޮޑު ކަމަށް ހޮސްޕިޓަލްގެ މެޑިކަލް ޑައިރެކްޓަރ ޑރ. އަލީ ނަޒީމް ވިދާޅުވެއްޖެއެވެ.
ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި، ޑރ. ނަޒީމް ވިދާޅުވީ ބަލި މީހަކު ގެންދިއުމަށް އެމްބިއުލެންސްއަށް އެދުމުން ނުފޮނުވާ ނުހުންނާނެ ކަމަށެވެ. އަދި ވިދާޅުވީ އެޗްޕީއޭއަށް ގުޅުމަށް އައިޖީއެމްއެޗުން ނުބުނާނެ ކަމަށެވެ.
ނަމަވެސް ކޮވިޑް-19ގެ މިދަނޑިވަޅުގައި އެމްބިއުލާންސްގެ ޑިމާންޑް ބޮޑުވެފައިވާ ކަމަށާއި، ބޭނުން ކުރަމުންދަނީ 5 އެމްބިއުލާންސްކަމަށް ވާތީ ލަސްތަކެއް ކުރިމަތިވެދާނެ ކަމަށް ޤަބޫލުކުރައްވާ ކަމަށް ޑރ. ނަޒީމް ވިދާޅުވިއެވެ.
ތެދު ތެދަށް ދަންނަވަންޏާ އަޅުގަނޑުމެންގެ މިއިންނަނީ ފަސް އެމްބިއުލާންސް މިވަގުތު. އެއީ ކުރިން އޮތީ ތިނެއް. ކުރިން އޮތީ ދެ އެމްބިއުލާންސް މިދިޔަ އަހަރު ތެރޭގައި ގެނައި. ޑިމާންޑް ބޮޑުވެއްޖެ. އެހެން ވެހިކަލްތައް މިހާރު އެވެއިލަބަލްއެއް ނޫން. ކުރީގަ ބަލިވެއްޖެއްޔާ ޓެކްސީއަކަށް އަރައިގެން ވެސް އާދެވޭ. އެކަމަކު އެއްޗެހި ނުދައްވާ. މިސާލަކަށް ޑަޔަލިސިސް ހަދަން އަންނަ ޕޭޝަންޓުން ވެސް އެބަޖެހޭ އެމްބިއުލެންސްގައި ގެނެސްދޭން އަޅުގަނޑުމެން. އެމީހުންނަށް ޑަޔަލިސިސް ނުހަދާ ނުތިބެވޭނެ.ޑރ. އަލީ ނަޒީމް
އެމްބިއުލާންސަށް އެރުވޭ ކޮންމެ ބަލި މީހަކީ ކޮވިޑް-19 އަށް ޕޮޒިޓިވް މީހެއްގެ ގޮތުގައި ބަލައިގެން ރައްކާތެރިކުރުމުގެ ފިޔަވަޅުތައް އަޅާކަން ފާހަގަކުރައްވައި ޑރ. ނަޒީމް ވިދާޅުވީ އުފުލާ ބަލިމީހުންގެ ޞިއްޙީ ޙާލު ކަށަވަރުނުކުރެވޭނެތީ، ކޮންމެ ދަތުރަކަށްފަހު މުޅި އެމްބިއުލަންސް ޑިސްއިންފެކްޓް ކުރާ ކަމަށެވެ. އަދި މިއީ ވަގުތުތަކެއް ނަގާކަމެއް ކަމަށް ޑރ. ވިދާޅުވިއެވެ.
ޑރ. ނަޒީމް ވިދާޅުވީ މިހާރަށްވުރެ އެމްބިއުލާންސްގެ ޚިދުމަތްތައް ހަރުދަނާ ކުރުމަށް މިހާރަށް ވުރެ އަވަހަށް ރެސްޕޮންޑު ކުރެވޭނެ ގޮތްތަކެެއް ބަލަމުން އަންނަ ކަމަށެވެ.
