ރާއްޖެއަށް ބޭނުންވާ ބައެއް ސިއްހީ ގިނަ އާލާތްތައް ގެނެސްފައިވާކަމަށާއި އޭގެތެރޭގައި 5000 ޓެސްޓްކިޓް ހިމެނޭކަމަށް ނޭޝަނަލް އިމަރޖެންސީ އޮޕަރޭޝަން ސެންޓަރުން ހާމަކޮށްފިއެވެ.

ބުރާސްފަތި ދުވަހުގެރޭ ދަރުބާރުގޭގައި ގާއިމްކޮށްފައިވާ ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޓާސްކްފޯހުގެ ތަރުޖަމާން މަބްރޫކް އަޒީޒް ވިދާޅުވީ ގިނަ އަދަދެއްގެ ސިއްހީ އާލާތްތަކާއިއެކު ރައްޖޭގެ ކާގޯ ބޯޓެއް މިރޭ ޖައްސާފައިވާކަމަށެވެ. އެގޮތުން ތައިލެންޑާއި ސިންގަޕޯރއަށް ގޮސް އައި ބޯޓުން، 5000 ޓެސްޓް ކިޓު، 5000 މާސްކް އަދި 500 ޕީޕީއީ ސެޓާއި އަދި 15 ބައިޕާސް ނޮން އިންވޭސިވް ވެންޓިލޭޓަރ ސެޓް ރާއްޖެއަށް ގެނެސްފައިވާކަމަށް މަބްރޫކް ވިދާޅުވި އެވެ.

މީގެކުރިން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން، ހެލްތް މިނިސްޓަރ އަބްދުﷲ އަމީން ވަނީ އެންމެ ފުރަތަމަ ރާއްޖޭގައި ޓެސްޓު ކުރުމުގެ ކަންކަން ފެށިއިރު ދުވާލަކު ކުރެވެނީ ގާތްގަނޑަކަށް 50 ނުވަތަ 100 ވަރަކަށް ސާމްޕަލް ކަމަށާއި ނަމަވެސް މިހާރު ދުވާލަކު 400 ސާމްޕަލް ޓެސްޓް ކުރެވެމުންދާނެ ކަމަށް ވިދާޅުވެފައެވެ. އެގޮތުން، ދެ ލެބޯޓަރީއެއްގައި ކޮވިޑް:19 ޓެސްޓްތައް ކުރެވެމުންދާ ކަމަށް އަމީން ވިދާޅުވި އެވެ.

ކޮވިޑް-19 އަށް ސާމްޕަލް ޓެސްޓް ކުރަމުންދަނީ އައިޖީއެމްއެޗުގެ ލެބޯޓަރީންނާއި ފުލުހުންގެ ލެބޯޓަރީން ނެވެ.