ކޮވިޑް-19އާ ގުޅިގެން ކޮންޓެކްޓް ޓްރޭސިން ހަދާއިރު، ނަތީޖާ ލިބެންދެން ވަރަށް ގިނަ ފަހަރު ގޭގައި ކޮންޓެކްޓުން ބަހައްޓަންޖެހޭ ކަމަށާއި، މިފަދަ މީހުން ޚާއްސަ ސަމާލުކަމެއް ދިނުމަށް ޓެކްނިކަލް އެޑްވައިޒަރީ ގްރޫޕްގައި ހިމެނިވަޑައިގަންނަވާ ޑރ. އަލީ ލަތީފް ގޮވާލައްވައިފިއެވެ.
ބުދަ ދުވަހުގެ ރޭ ދަންވަރު ބޭއްވި ނޫސްވެރިންގެ ބައްދަލުވުމުގައި ޑރ.ލަތީފް ވިދާޅުވީ ކޮވިޑް-19 ޖެހޭ މީހުންގެ ތެރެއިން ހަކުރު ބަލި، ލޭމައްޗަށް ދިއުން، ކިޑްނީ ބަލި އަދި ފުއްޕާމޭގެ ބަލިތަކުގެ އިތުރުން ދާއިމީ ކޮށް ބޭސް ކުރާ މީހުންނަށް ބަލީގެ ނުރައްކާ ބޮޑުވާ ކަމަށެވެ.
ކޮވިޑް-19 ޖެހިފައިވާ މީހަކާ ސީދާ ދިމާވެ، ހައިރިސްކް ކޮންޓެކްޓުން ގޭގައި މަޑުކުރަންޖެހޭ ހާލަތުގައި ޚާއްސަ ސަމާލުކަމެއް ދޭންޖެހޭކަން ފާހަގަކުރައްވައި ޑރ.ލަތީފް ވިދާޅުވީ ދާއިމީ ބަޔަކަށް ބޭސްކުރާ މީހަކު އެގޭގައި އުޅޭ ކަމަށްވާނަމަ، އެއްވެސް ގޮތަކަށް އެޕޭޝަންޓާ ދިމާ ނުވުމަކީ ވަރަށް މުހިންމު ކަމެއް ކަަމަށެވެ.
ޑރ.ލަތީފް ވިދާޅުވީ ކޮންޓެކްޓް ޓްރޭސިން ހަދާއިރު، ނަތީޖާ ލިބެންދެން ވަރަށް ގިނަ ފަހަރު ގޭގައި ކޮވިޑް-19ގެ ކޮންޓެކްޓުން ބަހައްޓަންޖެހޭ ކަމަށެވެ. މިކަހަލަ ވަގުތުތަކުގައި އެގެތަކުގައި ކަރަންޓީންގެ ކަންކަން ބަރާބަރަށް ކުރިއަށް ގެންދިއުމަށް ޑރ.ލަތީފް އެދިލެއްވިއެވެ.
އެކަހަލަ ހާލަތެއް ހުރެއްޖެއްޔަ ރަނގަޅު ގޮތަކީ ވަކި ކޮޓަރިއެއްގައި މަޑުކުރުން. ވަކި ކޮޓަރިއެއްގައި މަޑުކުރާއިރު ބޭރަށް ނުނިކުމެ އެހުރިހާ ކަމެއް އެކޮޓަރި ތެރެއިން ކުރުމަކީ މުހިންމު ކަމެއް. މިސާލަކަށް ދަންނަވަންޏާ ފަރިކުޅުވަން ޖެހިއްޖެއްޔާ ވަކިން އެކޮޓަރީގައި އެކަން ކުރެއްވުން. އޭގެ އިތުރުން ގޭގައި ފާހަނާ ވެސް ވަކިކުރުން. އަދި ގޭގައި ކަހަލަ ގޮތަކަށް ހަމަޖެހިފައި ނެތިއްޔާ ފާހަނާ ބޭނުން ކުރުމަށްފަހު ސާފު ކުރުމަކީ ވަރަށް މުހިންމު ކަމެއް. އޭގެ އިތުރުން އެކޮޓަރީގައި ހުންނަ ކުނި އެކަހަލަ އެއްޗެހިތައް ވެސް ވަކިން ޚާއްސަ ޑަސްބިންއެއް ބަހައްޓާފަ އެޑަސްބިންގައި ޑަބަލް ބޭގް ބައްލައްވާފަ ކޮންމެވެސް މީހަކު ލައްވާ އެއްޗެހިތައް ނަންގަވަން ޖެހޭނީ.ޑރ. އަލީ ލަތީފް
ޑރ.ލަތީފް ވިދާޅުވީ މިދަނޑިވަޅުގައި އެންމެންގެ ސަލާމަތާ ރައްކާތެރިކަމަށް ވިސްނަންޖެހޭ ކަމަށެވެ. އަދި މިކުރަމުންދާ މަސައްކަތްތަކުގައި އާންމުންގެ އެއްބާރުލުން ދިނުމަކީ މުހިންމު ކަމެއްގެ ގޮތުގައި ފާހަގަކުރެއްވިއެވެ.
