ކޮވިޑް-19 އަށް ދުވާލަކު 400 ސާމްޕަލް ރާއްޖޭގައި މިހާރު ޓެސްޓު ކުރެވެމުންދާ ކަމަށް ހެލްތު މިނިސްޓަރު އަބްދުﷲ އަމީން ވިދާޅުވެއްޖެއެވެ.

ބުދަ ދުވަހުގެ ރޭ ނޭޝަނަލް އިމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ހެލްތް މިނިސްޓަރ އަމީން ވިދާޅުވީ، އެންމެ ފުރަތަމަ ރާއްޖޭގައި ޓެސްޓު ކުރުމުގެ ކަންކަން ފެށިއިރު ދުވާލަކު ކުރެވެނީ ގާތްގަނޑަކަށް 50 ނުވަތަ 100 ވަރަކަށް ސާމްޕަލް ކަމަށާއި ނަމަވެސް މިހާރު ދުވާލަކު 400 ސާމްޕަލް ޓެސްޓް ކުރެވެމުންދާނެ ކަމަށެވެ. އެގޮތުން، ދެ ލެބޯޓަރީއެއްގައި ކޮވިޑް:19 ޓެސްޓްތައް ކުރެވެމުންދާ ކަމަށް އަމީން ވިދާޅުވި އެވެ.

ކޮވިޑް-19 އަށް ސާމްޕަލް ޓެސްޓް ކުރަމުންދަނީ އައިޖީއެމްއެޗުގެ ލެބޯޓަރީންނާއި ފުލުހުންގެ ލެބޯޓަރީން ނެވެ.

ނޫސްވެރިންގެ ބައްދަލުވުމުގައި ޓާސްކްފޯސްގެ ތަރުޖަމާނު މަބްރޫކް އަޒީޒު ވެސް ވަނީ ޓެސްޓް ކުރަން ބޭނުންވާ މެޝިނަރީ ހޯދުމަކީ ހުރިހާ ގައުމުތަކަށްވެސް ދިމާވެފައިވާ ދައްޗެއް ކަމަށާއި އެގޮތުން ރާއްޖެއަށްވެސް ޓެސްޓް ކުރެވޭނެ މެޝިން ލިބުމުގައި ދަތިކަމެއް އުޅޭ ކަމަށެވެ.

އެެހެނަމަވެސް ޓެސްޓު ކުރުމަށް އިތުރު މެޝިންތައް ރާއްޖެ ގެނައުމަށް މަސައްކަތް ކުރަމުންދާ ކަމަށާއި އަދި ޓެސްޓު ކުރެވޭނެ އިންތިޒާމުތައް ރާއްޖޭގެ އެހެން ސަރަހައްދުތަކުގައި ފުޅާކުރުމަށް ވެސް މަސައްކަތް ކުރަމުންދާ ކަމަށް މިނިސްޓަރު އަމީން ވިދާޅުވި އެވެ.

އައިޖީއެމްއެޗުން ވަނީ ކޮވިޑް-19 އަށް ޓެސްޓުކުރަން 16 ލެބޯރެޓަރީ ޓެކްނިޝަނުން ޓްރެއިން ކުރެވިފައިވާ ކަމަށް މީގެކުރިން ބުނެފަ އެވެ.

ލެބޯރެޓަރީ ޕްރޮފެޝަނަލް ވީކް (19 އޭޕްރިލް އިން 25 އޭޕްރިލް) އާ ގުޅޭ ގޮތުން އަައިޖީއެމްއެޗުން ނެރުނު ބަޔާނެއްގައި ބުނީ، ރާއްޖެއިން ކޮވިޑް-19 ގެ ފުރަތަމަ ކޭސް ދެނެގަނެވުނުއިރު، ޕީސީއާރް ޓެސްޓު ކުރަން ތިބީ ލެބޯރެޓަރީގެ ތިން ޕްރޮފެޝަނަލުން ކަމަށެވެ.

ނަމަވެސް އެ ވަގުތުން ފެށިގެން 24 ގަޑިއިރު ޕީސީއާރު ހަދާ އަދި އިތުރު ޕްރޮފެޝަނަލުން ޓްރެއިން ކުރަމުން ދިޔަކަމަށެވެ. އެގޮތުން މިހާރު އައިޖީއެމްއެޗް ލެބޯޓްރީގެ ޖުމްލަ 13 ޕްރޮފެޝަނަލުންނާއި ފުލުހުންގެ ލެބޯޓްރީ ޕްރޮފެޝަނަލަކާއި "ޝީ" ގެ ލެބޯޓްރީ ދެ ޕްރޮފެޝަނަލުން ކޮވިޑް ޕީސީ އާރަށް ޓްރެއިން ކުރެވިފައިވާ ކަމަށް އައިޖީއެމްއެޗުން ބުނެއެވެ. އަދި މިހާރުވެސް ލެބޯޓްރީގެ ހަތަރު ޕްރޮފެޝަނަލުންނާއި ފުލުހުންގެ ލެބޯޓްރީ ޕްރޮފެޝަނަލަކު، ކޮވިޑް ޕީސީއާރަށް ޓްރެއިން ކުރެވިފައިވާ ކަމަށް އައިޖީއެމްއެޗުން ވަނީ ފާހަގަކޮށްފައެވެ.