ކ. މާފުށީ ޖަލުގައި ދީނީ ގޮތުން ހަރުކަށި ފިކުރު ގެންގުޅޭ ބައެއް ފަރާތްތަކުން ނުރައްކާތެރި ކަންތައްތަކެއް ހިންގަން އުޅެނިކޮށް ފުލުހުން އެކަން ހުއްޓުވައިފިއެވެ.

ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި އެސިސްޓެންޓް ކޮމިޝަނަރ އޮފް ޕޮލިސް މުޙައްމަދު ރިޔާޒު ވިދާޅުވީ އޭޕްރީލް މަހުގެ 27 ވަނަ ދުވަހުގެ ހެނދުނު މާފުށީ ޖަލުގައި ފުލުހުންނާއި ކަރެކްޝަންސް ސަރވިސް ގުޅިގެން ބަލާ ފާސް ކުރުމުގެ ޚާއްޞަ އޮޕަރޭޝަނެއް ކުރިއަށް ގެންދިޔަ ކަމަށެވެ.

ރިޔާޒު ވިދާޅުވީ މިއޮޕަރޭޝަނަކީ ދިވެހި ރާއްޖޭގައި ދީނީ ގޮތުން ހަރުކަށި ފިކުރު ގެންގުޅޭ ބައެއް ފަރާތްތަކުން ނުރައްކާތެރި ކަންތައްތަކެއް ކުރުމަށް ރާވާ ކަމަށް ފުލުހުންނަށް ލިބުނު ޖާސޫސޫ މަޢުލޫމާތުގެ މައްޗަށް ބިނާކޮށް ކުރިޔަށް ގެންދިޔަ އޮޕްރޭޝަނެއް ކަމަށެވެ.

ލިބިފައިވާ މަޢުލޫމާތަށް ބަލާއިރު، މާފުށީ ޖަލުގައި މިކަން ކުރުމަށް މަސައްކަތް ކުރަނީ ހަރުކަށި ވިސްނުމުގެ ބައެއް މައްސަލަތަކާ ގުޅިގެން ޖަލުގައި ބަންދުކޮށްފައި ތިބި ބަޔަކު، އެމީހުންނާ ގުޅުން އޮންނަ ބޭރުގައި ތިބި ބަޔަކާ މުޢާމަލާތު ކޮށްގެންކަމަށް ރިޔާޒު ވިދާޅުވިއެވެ.

ރިޔާޒު ވިދާޅުވީ މިއޮޕަރޭޝަނުގައި ބަލާ ފާސްކުރި ގޮޅިތަކުުން 5 މޯބައިލް ފޯނާއި، މޯބައިލް ފޯނާ ގުޅުންހުރި އެހެނިހެން އާލަތްތައް ފެނިފައިވާ ކަަމަށެވެ. މީގެ ތެރޭގައި ޗާޖަރާއި، ޔޫއެސްބީ ވާގަޑާއި، ހަރުކަށި ފިކުރު ފަތުރަން ބޭނުންކުރާ ބައެއް ފޮތްތައް ފެނިފައިވައިވާ ކަމަށް ރިޔާޒު ވިދާޅުވިއެވެ.

އެ މައްސަލަ ފުލުހުން ދަނީ އިތުރަށް ތަހުޤީޤު ކުރަމުންނެވެ.