މިމަހުގެ 15 ވަނަ ދުވަހުގެ ރޭގެ ވަގުތެއްގައި އދ. މަހިބަދޫ ބަނދަރުގައި އަޅާފައި އޮތް ހަ އުޅަނދެއްގައި ރޯކޮށްލީ އެރޭ ފަތިހުގެ ވަގުތެއްގައި ޑިންގީއެއްގައި އެރަށަށް ކައިރި ކުރި ބަޔަކުކަމަށް ފުލުހުން ބުނެފިއެވެ.
ބުދަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި އެސިސްޓެންޓް ކޮމިޝަނަރ އޮފް ޕޮލިސް މުޙައްމަދު ރިޔާޒު ވިދާޅުވީ 2020 އޭޕްރީލް 15 ވަނަ ދުވަހު ރޭގެ ވަގުތެއްގައި މަހިބަދޫ ފަޅު ތެރޭގައި އަޅާފައިވާ 5 ލޯންޗަކާއި ދެޑިންގީއެއްގައި އަލިފާން ރޯކޮށްލި މައްސަލަ ތަޙުޤީޤު ކުރަމުންދާ ކަމަށާއި، މިހާތަނަށް ބެލިބެލުމުން މިޢަމަލު ހިންގާފައިވަނީ އެރޭ ފަތިހުގެ ވަގުތެއްގައި ޑިންގީއެއްގައި އެރަށަށް ކައިރި ކުރި ބަޔަކު ކަމަށް ތަޙުޤީޤުތަކުން ހޯދިފައިވާ ކަމަށެވެ.
ރިޔާޒު ވިދާޅުވީ އެލޯންޗުތައް ރޯކޮށްލުމަށްޓަކައި އެމީހުން ރަށުގެ ތޮށިގަނޑު މައްޗަށް އެރުމަށްފަހު ފުޅިއަކަށް އަލިފާން ރޯވާ ފަދަ އެއްޗެއް އަޅާ އޭގައި ރޯކޮށްލުމަށްފަހު، ލޯންޗުތަކަށް އުކާފައިވާކަން ތަޙުޤީޤަށް ހޯދިފައިވާ ކަމަށެވެ.
މިމަސައްކަތުން ލޯންޗުގައި ނުޖެހި މޫދުގެ ތެރެއަށް ވެއްޓިފައި އޮތް ފުޅިއެއް ވަނީ ހޯދިފައި. މައްސަލައާ ގުޅިގެން ވެސް ތަޙުޤީޤުގެ މަސައްކަތަށް ޓެކްނިކަލް ލެވަލްގައި ކުރިއަށް ގެންދަން. ތަޙުޤީޤާއި ގުޅިގެން އަޅުގަނޑުމެން އިތުރަށް ހޯދަންޖެހޭ ހޯދުންތައް ހޯދުމަށްޓަކައި ކަމާ ބެހޭ ފަރާތްތަކުން މަޢުލޫމާތު އެއްކުރުމުގެ އިތުރުން އަޅުގަނޑުމެންނަށް މިހާތަނަށް ލިބުނު ބައެއް ވީޑިއޯ ފުޓޭޖުތައް ވެސް އިންވެސްޓިގޭޓް ކުރުމުގެ މަސައްކަތްތައް ކުރިއަށް އެބަގެންދަންއެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު
ފަހަކަށް އައިސްފައި ރާއްޖޭގައި ހިންގާފައިވާ އަލިފާނުގެ ޙާދިސާތަކުގައި އެއްގޮތް ކަންތައްތަކެއް ހުރިކަން ފާހަގަކުރައްވައި ރިޔާޒު ވިދާޅުވީ މިމައްސަލާގައި ލ. އަތޮޅުގައި ފުލުހުންގެ ލޯންޗެއް ރޯކޮށްލުމުގައި ޢަމަލުކޮށްފައިވާ ގޮތާއި، ވަކިން ޚާއްޞަކޮށް މިޢަމަލު ހިންގުމަށްޓަކައި ބޭނުންކުރާ އެއްޗެހި އެއްގޮތް ކަމަށެވެ.
ފުޅިއެއް ކަހަލަ އެއްޗަކަށް އަލިފާން ފަސޭހައިން ރޯވާ ޒާތުގެ އެއްޗެއް އެޅުމަށްފަހު އޭގައި އަލިފާން ރޯކޮށްލައިގެން މިލޯންޗުތަކަށް އުކައިގެން ތަންތަން ރޯކޮށްލަނީ. މިހާތަނަށް މިމަސައްކަތްތަކުގެ ތެރެއިން މަހިބަދޫ ފަޅު ތެރޭގައި އަޅާފައިވާ ލޯންޗުތަކުގެ ތެރެއިން އަނދައިގެންދިޔަ ލޯންޗުތައް ފުލުހުންގެ ބެލުމުގެ ދަށުން އަޅުގަނޑުމެން ވާނީ ފަޅު ތެރެއިން ނަގާފައި.އެސިސްޓެންޓް ކޮމިޝަނާ އޮފް ޕޮލިސް މުހައްމަދު ރިޔާޒު
ރިޔާޒު ވިދާޅުވީ މިމައްސަލައާ ގުޅިގެން މިހާތަނަށް މީހަކު ހައްޔަރު ކުރެވިފައި ނުވި ނަމަވެސް ތުހުމަތު ކުރެވޭ ބައެއް ހޯދާ ތަޙުޤީޤު ކުރިއަށް ގެންދާ ކަމަށެވެ. އަދި މިހާތަނަށް 05 މީހަކު ދިރިއުޅެމުންދާ ގެ ބަލާ ފާސްކޮށް ބައެއް ޑިޖިޓަލް ހެކި ނަގާފައިވާ ކަމަށާއި، ކުރަންޖެހޭ ފަންނީ މަސައްކަތްތައް ކުރަމުން އަންނަކަމަށް ރިޔާޒު ވިދާޅުވިއެވެ.
