ރާއްޖެއިން ކޮވިޑް-19 ޖެހުނު މީހާ މަރުވީ ވަކި ފަރުވާއެއް ނުދެވިގެން ނޫން ކަމަށް ޓެކްނިކަލް އެޑްވައިޒަރީ ގްރޫޕް (ޓެގް) ގެ ލީޑަރު އަލީ ލަތީފް ވިދާޅުވެއްޖެއެވެ.

ކޮވިޑް-19 ޖެހިގެން ރާއްޖެއިން ފުރަތަމަ ފަހަރަށް މީހަކު މަރުވެފައިވަނީ ބުދަ ދުވަހުގެރޭގެ ވަގުތެއްގައެވެ. މަރުވެފައިވަނީ އުމުރުން 83 އަހަރު އާމިނަތު އާދަމް އެވެ.

އެމީހާގެ މަރާއި ގުޅުވައިގެން ޝޯޝަލް މިޑިއާގައި އެކި ގޮތް ގޮތަށް ދަނީ ވާހަކަތައް ދެކެވެމުންނެވެ. ބުދަ ދުވަހުގެ ދަންވަރު ކުއްލި ގޮތަކަށް ނެޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ޑރ. ލަތީފް ވިދާޅުވީ، ކޮވިޑް-19 އަށް ދޭނެ ވަކި ޚާއްޞަ ފަރުވާއެއް ނެތުމާއެކު، ޓެސްޓްކޮށް ނަތީޖާ ލިބެންދެން ކޮންޓެކްޓުން އަބަދުވެސް ބަލަހައްޓަމުން ގެންދަނީ އެމީހަކު އުޅޭ ގޭގައި ކަމަށެވެ.

އެމީހާގެ ސާމްޕަލް ނެގުމުގެ ކަންތަކުގައި ލަސްކަމެއް އުޅޭތޯ ނޫސްވެރިޔަކު ސުވާލު ކުރުމުން ޑރ. އަލީ ލަތީފް ވިދާޅުވީ، މަރުވި މީހާގެ ސާމްޕަލް ނަގާފައިވަނީ 27 ވަނަ ދުވަހުގެ ރޭގަނޑު ކަމަށެވެ. އަދި އެމީހާ ހޮސްޕިޓަލަށް ގެންގޮސްފައިވަނީ ބުދަ ދުވަހު ހެނދުނު ކަމަށް ވިދާޅުވިއެވެ.

އޭނާ ވިދާޅުވީ، ޙާލު ސީރިއަސްވެގެންދާ ޙާލަތްތަކުގައި ޢާންމު ގޮތެއްގައި ޢަމަލުކުރަނީ އޮކްސިޖަން ދިނުމާއި، އައިވީ ފްލުއިޑް ދިނުމުގެ އިތުރުން އެންޓިވައިރަލް ދިނުން ކަމަށެވެ. އެހެން ކަމުން އެ އަންހެން މީހާ އަށް ވަކި ޚާއްޞަ ފަރުވާއެއް ނުދެވިގެން މަރުވީ ކަމަށް ޤަބޫލުނުކުރައްވާ ކަމަށެވެ.

އަންހެން މީހާގެ މަރާއި ގުޅިގެން ޝޯޝަލް މީޑިއާގައި ގިނަ ބަޔަކު ދަނީ ހެލްތު މިނިސްޓްރީގެ އިތުރުން އެޗްޕީއޭ އަށް ތުހުމަތުގެ އިނގިލި ދިއްކުރަމުންނެވެ.