ކޮވިޑް-19 އަށް ރާއްޖެއިން ޕޮޒިޓިވްވި ސިފައިންގެ ޢަދަދު 20ށް އަރާފައިވާކަމަށްް ޝަނަލް އިމަރޖެންސީ އޮޕަރޭޝަން ސެންޓަރުން ބުނެފިއެވެ.
ކޮވިޑް-19 ގެ ޓާސްކް ފޯހުން ކުރިޔަށް ގެންދިޔަ ނޫސްވެރިންގެ ބައްދަލުވުމުގައި ޑރ އިބްރާހީމް އަފްޒަލް ވިދާޅުވީ 29 އޭޕްރީލް ގައި ޕޮޒިޓިވްވި މީހުންގެ ތެރެއިން ގިނަ މީހުންނަކީ "އެމްއެންޑީ" ކްލަސްޓަރ އަށް ނިޞްބަތްވާ މީހުން ކަމަށެވެ. އެމްއެންޑީ ކްލަސްޓަރ އަކީ ސިފައިންނަށް ނިޞްބަތްވާ ކްލަސްޓަރ އެވެ.
މީގެތެރޭގައި ހިމެނެނީ ކަޅުތުއްކަލާ ކޮށިން ޕޮޒިޓިވްވި ހަތަރު ސިފައިންނާއި، ކޮވިޑް ވިލެޖުން ޕޮޒިޓިވްވި ދެ ސިފައިންނެވެ. އަދި އެމްއެންޑީއެފްގެ އިލެކްޓްރިކަލް މެކޭނިކަލް އިންޖިނިއަރިންގެ ވަރކްޝޮޕް (އެމްއީއެމްއީ) އިން 14 ސިފައިން ހިމެނޭކަމަށް ޑރ އަފްޒަލް ވިދާޅުވިއެވެ.
ޑރ އަފްޒަލް ވިދާޅުވީ ޚާއްޞަގޮތެއްގައި އެމްއެންޑީއެފްގެ ކްލަސްޓަރއަށް ވުމުން ވަރަށް ގަދައަށް ކޮންޓެކްޓް ޓްރޭސިންގެ ބައި ކުރިއަށް ގެންދާނެ ކަމަށެވެ. އެހެންނަމަވެސް ޕޮޒިޓިވްވި ސިފައިންގެ ކޮންޓެކްޓުންގެ ގޮތުގައި މިހާތަނަށް ހޯދިފައިވާ މީހުންގެ ޢަދަދެއް ޑޮކްޓަރު ވިދާޅެއް ނުވެއެވެ. ޑޮކްޓަރު ވިދާޅުވީ އެ މަޢުލޫމާތު ފަހުން ހިއްސާކުރައްވާނެ ކަަމަށެވެ.
ކޮވިޑް-19 އަށް ސިފައިންގެ މީހަކު ޕޮޒިޓިވް ވެފައިިވާކަން އެންމެ ފުރަތަމަ ހާމަކޮށްފައިވަނީ މި މަހުގެ 21 ވަނަ ދުވަހުއެވެ. އޭނާގެ ކޮންޓެކްޓުންގެ ގޮތުގައި 41 މީހަކު ތިބިކަމަށް އެޗްޕީއޭއިން ވަނީ ބުނެފައެވެ.
ސިފައިންގެ ބަޔަކު ޕޮޒިޓިވްވުމާއި ގުޅިގެން ބޭއްވި ނޫސްވެރިންގެ ބައްދަލުވުމެއްގައި ކާނަލް ހުސައިން އަލީ ވިދާޅުވެފައިވަނީ ސިފައިންގެ ތެރެއިން ބަޔަކު ޕޮޒިޓިވްވެ އިތުރު ސިފައިންތަކެއް އެކަހެރިކުރަން ޖެހޭނެ ޙާލަތެއް އަތުވެދާނެ ކަމަށް ސިފައިންގެ ލީޑަރޝިޕް ތައްޔާރުވެފައިވާ ކަމަށެވެ.
ސިފައިންނާއި ފުލުހުންގެ ތެރެއިން 600 އަށްވުރެ ގިނަ މީހުން ގެއަށް ނުދެވޭގޮތަށް ވަނީ އެކަހެރި ކޮށްފައެވެ. މިހާތަނަށް އައިއިރު ފުލުހުންގެ ތެރެއިން 130 ފުލުހަކު ކަރަންޓީނު ކުރެވިފައިވާ ކަމަށް މަބްރޫކް ވަނީ މީގެކުރިން ބޭއްވި ނޫސްވެރިންގެ ބައްދަލުވުމެއްގައި ވިދާޅުވެފައެވެ.
ފްރޮންޓްލައިންގައި މަސައްކަތްކުރާ މީހުންގެ ރައްކާތެރިކަމަށްޓަކައި އަދި އެމީހުންގެ ފުށުން އެމީހުންގެ ޢާއިލާ ރައްކާތެރިކުރުމަށްޓަކައި ކުރިޔަށް އޮތްތަނުގައިވެސް ބޭނުންވެއްޖެނަމަ އެމީހުން އެމީހުންގެ ޢާއިލާ ކައިރިއަށް ނުދެވޭގޮތަށް ތަންތަން ހަމަޖައްސަމުންދާ ކަމަށް ޓޫރިޒަމް މިނިސްޓަރ އަލީ ވަހީދު ވަނީ ވިދާޅުވެފައެވެ.
