ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ރައްޔިތުންގެ މަޖިލީހުގެ ގަވާއިދާ މިނިސްޓަރ އޮފް ހެލްތް ޢަބްދުﷲ އަމީން ޚިލާފުވެޑައިގެންފައިވާކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.

ރައްޔިތުންގެ މަޖިލީހުން ނެރުނު ނޫސްބަޔާނުގައި ހެލްތް މިނިސްޓަރު އަމީން ޤާނޫނުއަސާސީއާއި ރައްޔިތުންގެ މަޖިލީހުގެ ގަވާއިދާ ހިލާފުވެވަޑައިގެންފިކަމަށް ބުނެފައިވަނީ މައްޗަންގޮޅި ދެކުނު ދާއިރާގެ މެންބަރު ޢަހްމަދު ޚައިތަމް މިނިސްޓަރ އޮފް ހެލްތް ޢަބްދުالله އަމީންގެ އަރިހުން ލިޔުމުން ޖަވާބު ހޯއްދެވުމަށް ފޮުނުއްވި ސުވާލަށް ޖަވާބު ފޮނުއްވާފައިނުވާތީއެވެ.

މި ބަޔާނުގައި ބުނެފައިވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 93 ވަނަ މާއްދާއާއި، ރައްޔިތުންގެ މަޖިލީހުގެގަވާއިދުގެ 80 ވަނަ މާއްދާގެ ދަށުން، ރައްޔިތުންގެ މަޖިލީހުގެ މައްޗަންގޮޅި ދެކުނު ދާއިރާގެ މެންބަރު އަޙްމަދު ޚައިތަމް، މިނިސްޓަރ އޮފް ހެލްތް ޢަބްދުﷲ އަމީންގެ އަރިހުން ލިޔުމުން ޖަވާބު ހޯއްދެވުމަށް ފޮނުއްވާފައިވާ ސުވާލު ނޯޓިސް 14 އެޕްރީލް 2020 ގައި، މިނިސްޓަރ އޮފް ހެލްތް ޢަބްދުﷲ އަމީނަށް ފޮނުވާފައިވާ ކަމަށެވެ. އަދި މި ސުވާލު ނޯޓިސްއަށް ޖަވާބުދެއްވުމަށް މިނިސްޓަރ އޮފް ހެލްތް ޢަބްދުﷲ އަމީންއަށް ރައްޔިތުންގެމަޖިލީހުގެ ގަވާއިދުގެ 74 ވަނަ މާއްދާގެ ދަށުން އެރުވުނު 14 ދުވަހުގެ ނޯޓިހުގެ މުއްދަތު 27 އެޕްރީލް 2020 ގެނިޔަލަށް ހަމަވެ، ޖަވާބުދެއްވުމަށް އަންގާރަ ދުވަހުގެ މެންދުރު 2:00 ގެ ނިޔަލަށް އެ މަނިކުފާނަށް އެރުވިފައިވާ މުއްދަތު ހަމަވިއިރުވެސް ޖަވާބު ފޮނުއްވާފައިނުވާ ކަމަށެވެ.

އެހެންކަމުން ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީއާއި ރައްޔިތުންގެ މަޖިލީހުގެ ގަވާއިދާ މިނިސްޓަރއޮފް ހެލްތް ޢަބްދުﷲ އަމީން ޚިލާފުވެޑައިގެންފައިވާކަމަށް ރައްޔިތުންގެ މަޖިލީހުގެ ރައީސް ދެކިވަޑައިގަންނަވާ ކަމަށް މި ބަޔާނުގައި ބުނެފައިވެއެވެ.

މަޖިލީހުގެ ރައީސަށް އެޑްރެސް ކުރައްވައި ހައިތަމް ފޮނުއްވެވި ސިޓީގައިވަނީ ވެންޓިލޭޓަރުތަކާއި ގުޅޭގޮތުން އޮޅުންފިލުވަން ބޭނުންވެލައްވާ 10 ސުވާލެއް ހިމަނުއްވާފައެވެ. މެމްބަރު ހައިތަމްގެ ފަރާތުން މި ހުށައެޅުން ހުށައަޅުއްވާފައިވާއިރު، ރާއްޖެއަށް ގެނައުމަށް ހަމަޖެހިފައިވާ ވެންޓިލޭޓަރތައް މާލެ އަންނާނެކަމަށް ހެލްތް މިނިސްޓަރ އަބްދުﷲ އަމީން މީގެ ކުރިން ވިދާޅުވެފައި ވެއެވެ. އެގޮތުން މި މަހުގެ 9 ވަނަ ދުވަހު ވެންޓިލޭޓަރުތައް ރާއްޖެއަށް ގެނެވޭނެ ކަމަށް އޭރު މިނިސްޓަރ ވިދާޅުވިއެވެ.

އެކަމާ ގުޅިގެން މެމްބަރު ހައިތަމްގެ ފަރާތުން ވަނީ ވެންޓިލޭޓަރުތައް ގެނައުމުގެ މަސައްކަތް ކުރިއަށްދާ ގޮތާއި، އެ މަސައްކަތް ކުރިއަށްދާ ޕްރޮސެސްގެ އިތުރުން، މިހާތަނަށް ވެންޓިލޭޓަރުތައް ލިބިފައި ނުވަނީ ކީއްވެތޯއާއި، އެކަމުގެ އެންމެ ފަހުގެ ޚަބަރަކީ ކޮބައިކަން ހެލްތް މިނިސްޓަރ އަބްދުﷲ އަމީންގެ އަރިހުން ސާފު ކުރެއްވުމަށް ހުށައަޅުއްވާފައެވެ.

ދުނިޔޭގައި ހަލުވިކަމާއެކު ފެތުރެމުންދާ ކޮވިޑް-19 ރޯގާއަށް ޕޮޒިޓިވްވާ މީހުންގެ ތެރެއިން ޙާލުބޮޑު ބަލިމީހުންނަށް ވެންޓިލޭޓަރުގައި ފަރުވާދޭން ޖެހޭއިރު، މިދިޔަ މާރޗު މަހުގެ 30 ވަނަ ދުވަހުގެ ރޭ ބޭއްވި ނޫސްވެރިންގެ ބައްދަލުވުމުގައި މަބްރޫކް ވިދާޅުވެފައިވަނީ، ރާއްޖޭގެ އެކި އަތޮޅުތަކުގެ ހޮސްޕިޓަލުތަކުގަ އާއި، މާލޭގެ ހޮސްޕިޓަލްތަކާއި، އަމިއްލަ ހޮސްޕިޓަލުތަކާއެކު ޖުމުލަ މުޅި ރާއްޖޭގައި މިވަގުތު 97 ވެންޓިލޭޓަރު އެބަހުރިކަމަށެވެ.

އޭގެ ކުރިން ބޭއްވި ނޫސްވެރިންގެ ބައްދަލުވުމުގައި ނޫސްވެރިޔަކު ކުރި ސުވާލަކަށް ޖަވާބު ދެއްވަމުން މަބްރޫކް ވެސް ވަނީ 70 ވެންޓިލޭޓަރު ރާއްޖެއިން ބޭރުން ގެނައުމުގެ މަސައްކަތް ކުރެވެމުންދާ ކަމަށް ވިދާޅުވެފަ އެވެ. އަދި އެތަކެތި ހުޅުމާލޭގައި މިހާރު ޤާއިމު ކުރެވޭ ފެސިލިޓީ ނިމެންވާއިރަށް ގެނެވޭނެ ކަމަށް މަބްރޫކު ވިދާޅުވެފައިވެއެވެ.