ކޮވިޑް-19 އާ ގުޅިގެން ސިންގަޕޫރުގައި އަޅާފައިވާ ފިޔަވަޅުތަކުގެ ތެރެއިން އެ ޤައުމުގެ ސޯޝަލް ޑިސްޓެންސިންގ ތަންފީޒުކުރުމަށް ހަދާފައިވާ ޤާނޫނަށް ތަބާނުވާނަމަ އަދަބެއްގެ ގޮތުން 6 މަހުގެ ޖަލު ހުކުމެއް އައިސްދާނެ ކަަމަށް އެ ޤާނޫނުން ބުނެއެވެ.

އެ ޤައުމުގެ ހެލްތް މިނިސްޓްރީން ބުރާސްފަތި ދުވަހު ނެރުނު ބަޔާނެއްގައި ބުނެފައިވަނީ އެއް މީޓަރުގެ ދުރުމިން ނުބަހައްޓާ، އަދި ކޮންމެހެން ޒަރޫރީ ބޭނުމެއްނެތި 10 މީހުންނަށްވުރެން ގިނައިން ތަންތަނަށް އެއްވާ މީހުން 10،000 ސިންގަޕޫރު ޑޮލަރުން ޖޫރިމަނާ ކުރާނެ ކަމަށެވެ. އަދި ބައެއް ހާލަތްތަކުގައި 6 މަހުގެ ޖަލު ހުކުމެއް އައުމަކީ ވެސް އެކަށީގެންވާ ކަމެއް ކަމަށެވެ.

ސޯޝަލް ޑިސްޓެންސިންގ ތަންފީޒުކުރުމަށް ހަދާފައިވާ ޤާނޫނަށް ހުކުރު ދުވަހު އަމަލުކުރަން ފަށާފައިވަނީ "ސްޓޭ ހޯމް" ނޯޓިސް ދީފައިވާ މީހުން ވެސް އެ ނޯޓިސްއާ އެއްގޮތަށް އަމަލުނުކުރާނަމަ އެ އަދަބުތައް ލިބުމަކީ އެކަށީގެންވާ ކަމެކެވެ.

"ސްޓޭ ހޯމް" ނޯޓިސް ދީފައިވަނީ ނޭވާލާ ނިޒާމުގެ މައްސަލަތައް ހުންނަ މީހުންނާއި އެ ޤައުމަށް އަންނަ މީހުންނަށެވެ.

ސިންގަޕޫރުގައި ވަޒަންވެރިގެން އުޅޭ މީހުން ފިޔަވާ، ގައުމުން ބޭރު ބަލި މީހުންނަށް މި ވަގުތު ފަރުވާ ކުރުން ހުއްޓާލުމަށް ނުވަތަ ފަރުވާ ކުރުން ފަސްކޮށްލުމަށް ސިންގަޕޫރުގެ ހެލްތް މިނިސްޓްރީން އެ ގައުމުގެ ސިއްހީ ޚިދުމަތްދޭ އަމިއްލަ ކްލިނިކްތަކާއި ހޮސްޕިޓަލުތަކާއި ސަރުކާރުގެ ހޮސްޕިޓަލުތަކުގެ ޑޮކްޓަރުންނަށް އެ ޤައުމުން ވަނީ އަންގާފައެވެ.

ސިންގަޕޫރުގައި ދިރިއުޅޭ މީހުން ފިޔަވާ، މިހާރު ސިންގަޕޫރުގައި ފަރުވާ ހޯދަމުންދާ ބޭރު ގައުމުތަކަށް ނިސްބަތްވާ މީހުންވެސް އެމީހުންގެ އަމިއްލަ ގައުމުން އިތުރު ފަރުވާ ހޯދުމުގެ ކަންކަން ހަމަޖެއްސުމަށްވެސް ސިންގަޕޫރު ސަރުކާރުންވަނީ އަންގާފައެވެ.

މާޗް 20 ވީ ހުކުރު ދުވަހުން ފެށިގެން ސިންގަޕޫރަށް އެއްވެސް މީހަކަށް އެތެރެ ވުމުގެ ހުއްދަ ދެނީ 14 ދުވަހަށް އަމިއްލަ އަށް ގޭގައި ކަރަންޓީން ވުން މަޖުބޫރު ކޮށްފައެވެ. 14 ދުވަހަށް ކަރަންޓީނުގައި ހުންނާނެ ތަނެއް ހަމަ ނުޖައްސާ އަންނަ މީހުން ސިންގަޕޫރަށް އެތެރެވިޔަ ނުދީ އަނބުރާ ފޮނުވާލާ ގޮތައްވެސް މިހާރު ވަނީ ސިންގަޕޫރު ސަރުކާރުން ހަމަޖައްސާފައެވެ.