އަތޮޅުތަކަށް ސްޕެޝަލިސްޓުން ހޯދުމުގައި ގިނަ ގޮންޖެހުންތައް ދިމާވަމުންދާ ކަމަށް ހެލްތު މިނިސްޓަރ އަބްދުﷲ އަމީން ވިދާޅުވެއްޖެ އެވެ.

ބުދަ ދުވަހުގެ ރައްޔިތުންގެ މަޖިލީހުގެ ޖަލްސާގައި މެމްބަރުން ކުރެއްވި ސުވާލުތަކަށް ޖަވާބު ދެއްވަމުން މިނިސްޓަރ ވިދާޅުވީ އެގޮންޖެހުންތައް ދިމާވާ މައިގަނޑު ސަބަބެއްކަމަށް ގަބޫލުފުޅު ކުރެއްވެނީ މުސާރައިގެ ކަންކަން ހުރި ގޮތުން ކަމަށެވެ. އަދި އަތޮޅުތަކުން އެކަށީގެންވާ މިންވަރަށް ބަލި މީހުން ނުލިބުމަކީވެސް އޭގެ ސަބަބެއްކަމަށް މިނިސްޓަރ ވިދާޅުވި އެވެ. އެކަންކަން ހައްލުކުރުމަށް މަސައްކަތް ކުރައްވަމުން ގެންދަވާކަމަށް މިނިސްޓަރ ވިދާޅުވި އެވެ.

ކުޅުދުއްފުށީ ހޮސްޕިޓަލްގައި ހިތުގެ ބަލީތަކަށް ފަރުވާދޭނެ ޑޮކްޓަރެއް ހަމަނުޖެހި ލަސްވަމުންދާ ދިޔުމާ ގުޅޭގޮތުން ކުޅުދުއްފުށި އުތުރު ދާއިރާގެ މެމްބަރ ޔާސިރު އަބްދުއްލަތީފު ކުރެއްވި ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ކުޅުދުއްފުށީ ހޮސްޕިޓަލަށް ކާޑިއޮލޮޖިސްޓުން ހޯދުމުގައި މިހާތަނަށް އައިރު ފަސް ފަރާތަކާ އިންޓަރވިއު ކޮށްފައިވާނެ ކަމަށެވެ. އެމީހުން ވަޒީފާއަށް ނެގުމަށްފަހު ވަޒީފާއަށް ނިކުތުމަށް ކައިރިވެފައިވަނިކޮށް އެއިން ކޮންމެ ފަރާތެއްވެސް ރާއްޖެ އައުން ކެންސަލްކުރަނީ ކަމަށް މިނިސްޓަރ ވިދާޅުވި އެވެ.

އެހެންކަމުން މިމައްސަލަ ހައްލުކުރުމަށް އައިޖީއެމްއެޗާ މިހާރު ވާހަކަ ދައްކާފައިވާކަމަށް މިނިސްޓަރ ވިދާޅުވި އެވެ.

މީގެއިތުރުން މިނިސްޓަރ ވިދާޅުވީ ރާއްޖޭގެ ޑޮކްޓަރުން އެކި ދާއިރާތަކުން ސްޕެޝަލައިޒް ވުމަށް އެކި ގައުމުތަކަށް ކިޔެވުމަށް ފޮނުވުމަށް އިތުރު ޖާގަ ހޯދުމުގެ މަސައްކަތް ސަރުކާރުން ކުރައްވަމުން ގެންދަވާ ކަމަށެވެ.