ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ސަރުކާރުގެ މަގާމެއްގައި ވައްކަން ކުރާ މީހެއް ހުރިއްޔާ، އެމީހަކާ މެދު ފިޔަވަޅު އަޅުއްވާނެ ކަމަށް ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލްގަފޫރު މޫސާ (ގަޕޯ) ވިދާޅުވެއްޖެ އެވެ.

ސަރުކާރުގެ ފަރާތުން، ފުވައްމުލަކު އުތުރު ދާއިރާގެ މެންބަރު މުޙައްމަދު ރަޝީދު ހުށަހަޅުއްވާފައިވާ، ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ޤާނޫނަށް އިޞްލާޙު ގެނައުމުގެ ބިލަށް ބަހުސްކުރައްވަމުން ގަޕޯ މިހެން ވިދާޅުވީ ނައިފަރު ދާއިރާގެ މެމްބަރު އަދި އިދިކޮޅު ޕީޕީއެމްގެ ނައިބު ރައީސް އަހުމަދު ޝިޔާމް އާއި ޕީޕީއެމް-ޕީއެންސީގެ ބައެއް މެމްބަރުން ވެލާނާ އިންޓަރނޭޝަނަލް އެއަރޕޯޓާއި އަދި ނަގަމުންދާ ފީތަކާއި ގުޅޭގޮތުން ދެއްކެވި ވާހަކަތަކަށް ރައްދު ދެއްވަމުންނެވެ.

ގަޕޯ ވިދާޅުވީ، ކުރީގެ ރައީސް އަބްދުﷲ ޔާމީންގެ ވެރިކަމުގައި ސަރުކާރުން ބޭނުންހާ ކަމެއް ބޭނުން ވަގުތަކު ނިމިދިޔަ 18 ވަނަ ރައްޔިތުންގެ މަޖިލީހުގެ ތެރެއިން ކުރަމުންދިޔަ ނަމަވެސް، މިހާރު އެކަން އެގޮތަށް ނުކުރެވޭނެ ކަމަށެވެ. ހާއްސަކޮށް، ރައީސް ޔާމީންގެ ވެރިކަމުގައި ހިނގި ވައްކާމާއި ކޮރަޕްޝަނާއި ފަސާދައިގެ އަމަލުތައް ފަދަ ޖަރީމާތައް ހިންގަން މިސަރުކާރު ހިންގާ މައިޕާޓީ އެމްޑީޕީގެ ސުޕަރ މެޖޯރިޓީ އޮތް، 19 ވަނަ ރައްޔިތުންގެ މަޖިލިސް އޮތީ ފުރުސަތު ދޭގޮތަކަށް ނޫންކަމަށް ވެސް ގަޕޯ ވިދާޅުވި އެވެ.

ގަޕޯ ވިދާޅުވީ ރައީސް ޔާމީންގެ ވެރިކަމުގައި މުޅިގައުމުގައި ވައްކަމާއި ފަސާދަ ހިންގާފަ، އެކަންކަމުން އަރާނުގަނެވި، އަދި އެވިސްނުމުގައި މަސައްކަތް ކުރަމުންދާ ބަޔަކު މިސަރުކާރުގެ ތެރޭގައި ތިބެދާނެ ކަމަށް ގަބޫލު ކުރައްވާކަމަށެވެ.

ގަޕޯ ވިދާޅުވީ މި ގައުމުން ވައްކަމާއި ކޮރަޕްޝަން ހުއްޓުވޭނީ އެންމެންގެ މަސައްކަތުން ކަމަށެވެ. އަދި ދައުލަތަށް ލިބޭ ބޮޑު އާމްދަނީއެއް ދަނީ ވައްކަމާއި ކޮރަޕްޝަނުގެ ތެރެއިން ކަމަށާއި އެކަން ހުއްޓުވަން ޖެހޭ ކަމަށްވެސް ގަޕޯ ވިދާޅުވި އެވެ.

ޝިޔާމު ވިދާޅުވީ، ރައީސް ޔާމީންގެ ވެރިކަމުގައި އެއަރޕޯޓް ސަރވިސް ޗާޖާއި އެއަރޕޯޓް ޑިވެލޮޕްމަންޓް ފީ ބޮޑުކޮށް ނަގަމުންދިޔައީ އެއަރޕޯޓް ތަރައްގީ ކުރުމަށް ނެގި އެއް ބިލިއަން ޑޮލަރުގެ ލޯނު ދެއްކުމަށް ކަމަށެވެ. އަދި މިހިނގާ 2020 އަހަރުގެ މާރޗު މަސް ނިމިމުން އެއާޕޯޓުން ނަގަމުންދިޔަ ފީތައް ކަނޑާލުމަށް ނިންމާފައިވާ ކަމަށް ވެސް ޝިޔާމު ވިދާޅުވި އެވެ. ނަމަވެސް ގަޕޯ ވިދާޅުވީ އެއަރޕޯޓް ފީތައް ބޮޑުކޮށް، ނަގަމުންދިޔަ ބަޔަކު، އަދި ރައްޔިތުން ބޭނުންކުރަމުންދިޔަ ކާޑުގެ ބާވަތްތައްކުންނާއި ކަރަށްޓް ބިލް ބޮޑު ކުރިބަޔަކު އެއަރޕޯޓް ފީތައް ކަނޑާލަން ވިސްނާފާނެ ކަމަށް ބުއްދިހުރި މީހަކު ގަބޫލު ނުކުރާނެ ކަމަށެވެ. އަދި އެފަދަ ވާހަކައެއް ދައްކާފައިނުވާއިރު، ޝިޔާމު އެހެއްދެވީ ކަނޑައެޅިގެން އިތުރުފުޅެއް ކަމަށްވެސް ގަޕޯ ވިދާޅުވި އެވެ.

ގަޕޯ ވިދާޅުވީ، އެމްޑީޕީގެ ސަރުކާރުން އެއަރޕޯޓް ފީތަކަށް ބަދަލު ގެނަޔަސް، ދިވެހި ރައްޔިތުންނަށް އަގު ބޮޑުވެގެން ނުދާނެ ކަމަށާއި، އެމްޑީޕީން އަބަދުވެސް މަސައްކަތް ކުރަމުންދަނީ އަދި ދާނީ ވެސް ރައްޔިތުންގެ ހެވާއި ލާބައަށް ކަމަށެވެ.