މިދިޔަ ބުރާސްފަތި ދުވަހު، ކްލައިން ހޮޓެލްސްގެ ފަރާތުން ރައްޔިތުންގެ މަޖިލީހަށް ހަދިޔާކުރި އިކޮލޮޖިކަލް ފުޑް ރީސައިކްލިންގ މެޝިނުން ގަސްކާނާ އުފެއްދެމުންދާ ކަމަށާއި އެހެންކަމުން މެމްބަރުންގެ ތެރެއިން ދަނޑުވެރިކަން ގިނައިން ކުރާ ދާއިރާތަކަށް ބެލުމެއްގެ ދަށުން ގަސްކާނާ ދޫކުރުމަށް ގަސްތުކުރައްވާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
މަޖިލީހުން ބާކީވާ ކާނާ ރީސައިކަލް ކުރުމަށް އިކޮލޮޖިކަލް ފުޑް ރީސައިކަލް މެޝިނެއް ވަނީ ހަދިޔާ ކޮށްފަ އެވެ. ރައީސް ނަޝީދު ވިދާޅުވީ މި މެޝިނުގައި ކައިފައި ބާކީ ހުންނަ ތަކެތި 100 ކިލޯ އަށް އެޅުމުން 36 ކިލޯގެ ގަސްކާނާ އުފެއްދޭކަމަށް އިދާރީ މޭޒުން މައުލޫމާތުދޭކަމަށެވެ.
36 ކިލޯ ގަސްކާނާ، ވަރަށް ކޮންސެންޓްރޭޓެޑް ގަސްކާނާ ލިބެނީ. އަޅުގަނޑު އެ އެއްޗެހި ބަލައިފިން. އަދި މި ތަނުގެ ގަސް ހައްދާ މީހާއާ އެކީ ގައި މުޙައްމައިދީއާ އެކީގައި އަޅުގަނޑު މި ވާހަކަ ދައްކައި ހަދައިފިން. އޭނަ އޭނަ ބަލާ، ގަސްތަކަށް މި އެއްޗެހި އަޅައިގެން އަޖުމަބަލަމުން އެބަ ގެންދޭ. އަދި މިކްސްކޮށްގެން ވެސް ވަރަށް ރަނގަޅަށް ބޭނުންކުރެވިދާނެ ކަމަށް ވަނީ. އެހެންވީމާ، މި ތަނުގައި މިހާރު މާ ގިނައިން ގަސްކާނާ އުފެދިގެން އަންނާތީ އަޅުގަނޑު ގަސްތުކުރަނީ، އިއްޒަތްތެރި މެންބަރުންގެ ތެރެއިން ދަނޑުވެރިކަން ގިނައިން ކުރާ ދާއިރާތަކަށް، ބެލުމެއްގެ ދަށުން ދޫކުރަމުންގެންދާނެ.ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރައީސް ނަޝީދު ވިދާޅުވީ އެކަމަށް ބޭނުންވެވަޑައިގަންނަވާ ބޭފުޅުން އަމީންޢާއްމު އަރިހުގައި ގަސްކާނާއަށް އެދިވަޑައިގަތުމުން، ގަސްކާނާ ހުރި މިންވަރަކުން ދޫކުރަމުން ގެންދާނެކަމަށެވެ. އެގޮތުން މެންބަރުން އަމީންޢާއްމަށް ޓެކްސްޓު މެސެޖެއް ކޮށްލެއްވުމުން އެކަން ހަމަޖެހިގެންދާނެ ކަަމަށް ރައީސް ނަޝީދު ވިދާޅުވި އެވެ.
މިކަމާއި ގުޅޭގޮތުން ވާހަކަދައްކަވަމުން މާމިގިނލި ދާއިރާގެ މެމްބަރ ގާސިމް އިބްރާހީމް ވިދާޅުވީ އެމަނިކުފާނުގެ ކޮންމެ ރިސޯޓަކަށް އެފަދަ މެޝިނެއް ގަތުމަށް ބޭނުންފުޅުވެ ވަޑައިގަންނަވާކަމަށެވެ.
އެ މެޝިން ތިޔަ ހަދިޔާކުރެއްވި ފަރާތުން މެޝިނެއް ގަންނަން، އަޅުގަނޑު ގެ ކޮންމެ ރިސޯޓަކަށް މެޝިނެއް ގަންނަން އެބަ ބޭނުންވޭ. އެހެންވީމާ، އެކަމަށް މަގުފަހިކޮށްދެއްވަ އިފިއްޔާ ވަރަށް ރަނގަޅު. އޭރުން މި ހުރިހާ ބޭފުޅުންނަށް އަނެއްބައި ދީފައި ، އަޅުގަނޑަށް އަޅުގަނޑުގެ ރަށްރަށަށް ދެން ބޭނުންވާ އެއްޗެހި އުފެއްދޭނެނޫންތޯ. ކާ އެއްޗެހީގެ ބާކީ އުކާލަން އެބަޖެހޭ ވަރަށް ބައިވަރު. އެ އެއްޗެހި އަޅުގަނޑުމެން ތަންތަނުން އެބަޖެހޭ. އެކަން ކުރެވިއްޖެއްޔާ ވަރަށް މޮޅު ކަމެއް އެއީމާމިގިނލި ދާއިރާގެ މެމްބަރ ގާސިމް އިބްރާހީމް
އިންސިނެރޭޓަރު ހަދިޔާކުރުމަށް ރައްޔިތުންގެ މަޖިލީހުގެ އިދާރާގައި ބޭއްވި ރަސްމިއްޔާތުގައި މަޖިލީހުގެ ފަރާތުން އިންސިނެރޭޓަރާ ހަވާލުވެވަޑައިގަތީ މަޖިލީހުގެ ރައީސް، ރައީސް މުހައްމަދު ނަޝީދެވެ. އެމިޝަނާއި ހަވާލުވެވަޑައިގަތުމަށްފަހު ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ އެމިޝަނަކީ މަޖިލީހަށް މުހިންމު މެޝިނެއްކަމަށެވެ.
