އައްޑޫއަށް ދިއުމަށްޓަކައި 4 ދިވެހިންނާއެކު ދަތުރުކުރަމުން ދިޔަ ލޯންޗް ފެނިއްޖެކަމަށް އެމްއެންޑީއެފްއިން ބުނެފިއެވެ.

މީޑިއާތަކަށް މައުލޫމާތު ދެމުން އެމްއެންޑީއެފުން ބުނެފައިވަނީ ހަތަރު މީހުނާއެކު ގދ.ފިޔޯރީން ފުރައިގެން އައްޑޫ ސިޓީ ހިތަދޫއަށް ދަތުރުކުރި "މިހޯ ޕެލެސް" ނަމަކަށް ކިޔާ ލޯންޗެއް ފުރިފަހުން ޚަބަރެއް ނުވެގެން ހޯދަމުންދަނިކޮށް ފަތިހު ފެނިފައިވާކަމަށެވެ.

ބުރާސްފަތި ދުވަހުގެ ހަވީރު 16:30 ހާއިރު މި ލޯންޗު ގދ.ފިޔޯރީން ފުރިފަހުން ޚަބަރެއް ނުވެގެން އެމްއެންޑީއެފް ކޯސްޓްގާޑަށް ބުރާސްފަތި ދުވަހުގެ ރޭ 22:33ގައި ރިޕޯޓުކުރުމާއެކު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންގެ ލޯންޗު އެފްއައިސީ ދޮޝިމޭނާ ވަނީ ހަރަކާތްތެރިވާން ފަށާފައެވެ.

މި ހާދިސާގައި ޚަބަރެއް ނުވެގެން ހޯދަމުންދިޔަ ލޯންޗު ފެނިފައިވަނީ ފަތިހު 04:00 ހާއިރު އައްޑޫސިޓީ ހިތަދޫގެ އުތުރުން 15 މޭލު ބޭރުންނެވެ. މި ލޯންޗުފަތިހު 05:30 ހާއިރު އެމްއެންޑީއެފް ސަދަން އޭރިއާ ކޯސްޓްގާޑް ސްކޮޑްރަންގެ އެހީތެރިކަމާއެކު އައްޑޫ ސިޓީ ހިތަދޫއަށް ގެންދެވިފައިވާކަމަށް އެމްއެންޑީއެފުން ވަނީ މައުލޫމާތުދީފައެވެ.

ލޯންޗުން ދަތުރުކުރި 4 މީހުންގެ ހާލުވެސް ރަނގަޅުކަމަށް އެމްއެންޑީއެފުން ވަނީ ބުނެފައެވެ.