ދުނިޔޭގެ އެކި ކަންކޮޅުތަކުގައި މިހާރު ފެތުރެމުން އަންނަ ކޮރޯނާވައިރަސްއާ ގުޅޭ މަޢުލޫމާތު ދިނުމަށް ރާއްޖޭގެ 52 ހެލްތު ސެންޓަރެއް އެއް ވިއުގައަކުން ގުޅާލައިގެން މަޢުލޫމާތު ދިނުމުގެ ޕްރޮގުރާމެއް ކުރިއަށް ގެންގޮސްފިއެވެ.

އިންދިރާގާންދީ މެމޯރިއަލް ހޮސްޕިޓަލް (އައިޖީއެމްއެޗް) އިން ބުނީ، މިއީ ރާއްޖޭގައި ހެލްތު ސެންޓަރުތައް އެއް ވިއުގައަކުން ގުޅާލައިގެން އެއް ވަގުތެއްގައި މަޢުލޫމާތު ސެޝަންތައް ކުރިއަށް ގެންދިޔަ ފުރަތަމަ ފަހަރު ކަމަށެވެ.

މޯލްޑިވްސް މެޑިކަލް އެސޯސިއޭޝަނާއި ގުޅިގެން ކުރިއަށް ގެންދިޔަ މި ސެޝަންތަކުގައި ޑރ ޝަހީދު، ޑރ މުއާޒް، ޑރ ނަޒްލާ އަދި ކްލިނިކަލް ނަރުހެއްގެ ގޮތުން ޝެހެނާޒް ރަޝީދު ބައިވެރިވެފައިވާ ކަމަށް އައިޖީއެމްއެޗުން ބުނެއެވެ.

އައިޖީއެމްއެޗުން މަޢުލޫމާތު ބައްދަލުވުން ބާއްވާފައިވާއިރު، ކޮރޯނާވައިރަސްއަށް ޢާންމުން ހޭލުންތެރިކުރުމުގެ ޚާއްޞަ ޕްރޮގުރާމުތަކެއް ހެލްތު މިނިސްޓްރީން ވަނީ ފަށާފައެވެ.

ހެލްތު މިނިސްޓްރީން ބުނީ އަތޮޅުތެރެއަށް ޢަމާޒުކޮށްގެން ކުރިއަށްގެންދާ މިޕްރޮގުރާމުތަކުގައި ރާއްޖެގެ ހުރިހާ އަތޮޅެއް ކަވަރކުރުމަށް ހަމަޖެހިފައިވާ ކަމަށެވެ.

ރަށްރަށުގައި ކުރިއަށްގެންދާ މިޕްރޮގުރާމުގެ ތެރެއިން ދޮރުން ދޮރަށް (ޑޯ-ޓު-ޑޯ/ ހޯމް ވިސިޓް)ކޮށް މަޢުލޫމާތު ދިނުމާއި ސްކޫލްތަކުގައި ތަޢުލީމު ޙާޞިލުކުރަމުން އަންނަ ކުދިންނަށާއި އޮފީސްތަކާއި އެކި މުއައްސަސާތަކުގައި ސެޝަންތައް ކުރިއަށް ގެންދާނެ ކަމަށް ހެލްތު މިނިސްޓްރީން މަޢުލޫމާތުދެއެވެ.

ކޮރޯނާވައިރަހުން ރައްކާތެރިވުމަށް ރާއްޖޭގެ މީހުން ދިރިއުޅޭ ހުރިހައި ރަށްރަށުގައި ހުރި ހޮސްޕިޓަލް، ޞިއްޙީ މަރުކަޒު އަދި ޞިއްޙީ އިދާރާތަކާއި މިކަމާ ބެހޭ އެހެނިހެން ފަރާތްތައް ގުޅިގެން އަންނަނީ މަސައްކަތްކުރަމުންނެވެ. މިވައިރަހުން ރައްކާތެރިވުމަށް ރާއްޖޭގެ ފަތުރުވެރިންނަށް ޚިދުމަތްދޭ ރިސޯޓުތަކުގައި ވެސް އަންނަނީ މަސައްކަތްކުރަމުންނެވެ.