އަޅުގަނޑުވީ ވައުދުތައް ފުއްދުމަށްޓައި ލޯކަލް ކައުންސިލްގެ އިންތިޚާބުގެ މެޖޯރިޓީ, ދިވެހި ރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް ރައްޔިތުން ހޯދަދޭންޖެހޭ ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ހުކުރު ދުވަހު ކުރިއަށް ގެންދާ އެމްޑީޕީގެ ޕްރައިމަރީގައި ވޯޓުލުމަށް އިސްކަންދަރު ސްކޫލަށް ވަޑައިގަންނަވާ ރާއްޖެޓީވީއަށް ދެއްވި އިންޓަވިއުއެއްގައި ރައީސް ސޯލިހު ވިދާޅުވީ ރިޔާސީ އިންތިޚާބާއި، މަޖިލިސް އިންތިޚާބު އެމްޑީޕީން ކާމިޔާބު ކުރީ ދައުދުތަކެއް ވެގެން ކަމަށެވެ. އެވައުދުތަކުގެ ތެރޭގައި އެންމެ މުހިންމު އެއް ވައުދަކީ ލާމަރުކަޒީ ނިޒާމުން ރާއްޖެ ހިންގުމަށް ކުރި ތާއީދު ކަމަށް ރައީސް ސޯލިހު ވިދާޅުވިއެވެ.
ރައީސް ސޯލިހު ވިދާޅުވީ ލާމަރުކަޒީ ނިޒާމުގެ ބޭނުން އޭގެ ފުރިހަމަ ގޮތުގައި ހިފުމަށް އެމްޑީޕީ މެމްބަރުން އިންތިޚާބު ކާމިޔާބު ކުރަންޖެހޭ ކަމަށެވެ. އަދި މިސަރުކާރުގެ ވައުދުތައް ފުއްދުމަށްޓަކައި އެމްޑީޕީއަށް އޭޕްރީލް މަހުގެ 04 ވަނަ ދުވަހު ބޭއްވޭ ލޯކަލް ކައުންސިލް އިންތިޚާބުގެ މެޖޯރިޓީ ދޭންޖެހޭ ކަމަށެވެ.
މިއީ އެނގިވަޑައިގަންނަވާނެ އެމްޑީޕީގެ ފިކުރެއް. މިކަން ދަންނަ މީހުން ތިބޭނެ އެމްޑީޕީގަ އަޅުގަނޑުވީ ވައުދުތައް ރައްޔިތުންނަށް ފުއްދުމަށްޓަކައި މިކަން ދަންނަ މިކަން އެނގޭ ބަޔަކަށް އަޅުގަނޑުމެން ބޭނުންވޭ. އެމީހުން ތިބީ އެމްޑީޕީގަ. އެހެންވީމަ އަޅުގަނޑަށް ގަބޫލުކުރެވެނީ ލޯކަލްކައުންސިލް އިންތިޚާބުގަ ރައްޔިތުން އެމްޑީޕީއަށް މެޖޯރިޓީ ހޯދަ ދޭން ބޭނުންވާ ސަބަބަކަށް.ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު
ރައީސް ސޯލިހު ވިދާޅުވީ އެމްޑީޕީ އެކަތިގަނޑެއްގެ ގޮތުގައި ދެމިއޮތުމުގެ ސިއްރަކީ ޕާޓީގެ މެމްބަރުންނަށް ބަސް ބުނުމުގެ ފުރުސަތު ދިނުމާއި، ޑިމަކްރަސީގެ ރީތި އުސޫލުން ކަންކަން ކުރިއަށް ގެންދިއުމުގެ ނަތީޖާ ކަމަށެވެ.
