ފުވައްމުލަށް ސިޓީގައި ފުލުހަކަށް މަރުގެ އިންޒާރުދިން 3 މީހަކު ހައްޔަރުކޮށްފިއެވެ.
ފުލުހުން ބުނީ ފުލުހަކަށް މަރުގެ އިންޒާރުދިން މައްސަލައިގައި ކޯޓު އަމުރެއްގެ ދަށުން 3 ދިވެހި ފިރިހެނުން އަންގާރަ ދުވަހު (މިއަދު) މެންދުރު ފުވައްމުލަކު ސިޓީން ފުލުހުންގެ ބެލުމުގެ ދަށަށް ގެނެސްފައިވާ ކަމަށެވެ. އަދި މި މައްސަލައިގައި ހައްޔަރުކޮށްފައިވަނީ 19 އަހަރުގެ ދިވެހި ފިރިހެނަކާއި، 25 އަހަރުގެ ދިވެހި ފިރިހެނަކާއި، 31 އަހަރުގެ ދިވެހި ފިރިހެނެއް ކަމަށެވެ.
މި މައްސަލަ އިތުރަށް ތަހުގީގުކުރަމުންދާކަމަށް ފުލުހުން ބުނެއެވެ.
ފުވައްމުލައް ސިޓީން އަންގާރަ ދުވަހު 3 ޒުވާނަކު ހައްޔަރުކޮށްފައިވާ އިރު، ސޯޝަލް މީޑިއާގައި މީހުންނަށް މަރުގެ އިންޒާރުދީ މުޖްތަމައުގައި ބިރުވެރިކަން އުފެދޭގޮތަށް އަނިޔާވެރިކަމަށް ހިތްވަރުދެމުންދާ މައްސަލައެއްގައި 19 އަހަރުގެ ދިވެހި ފިރިހެނެއް ވަނީ ހޮނިހިރު ދުވަހު ހައްޔަރުކޮށްފައެވެ. މި މައްސަލަ ވެސް ފުލުހުން އަންނަނީ ތަހުގީގުކުރަމުންނެވެ.
