މޯލްޑިވްސް މެޑިކަލް އެންޑް ހެލްތު އެކްސްޕޯއަށް ޢާންމުންގެ ބޮޑު ތަރުހީބެއް ލިބެމުން އަންނަ ކަމަށް އެމްވީ މެޑިކަލްސްގެ ޑިރެކްޓަރ މާރކެޓިންގ އެންޑް ޕަބްލިކް ރިލޭޝަންސް އަބްދުލް ޖަލީލް ހުސައިން ވިދާޅުވެއްޖެއެވެ.
އެކްސްޕޯއާ ބެހޭ ގޮތުން ވާހަކަ ދައްކަވަމުން ޖަލީލް ވިދާޅުވީ މި އެކްސްޕޯއަށް ހީކުރި ވަރަށް ވުރެ ބޮޑު ތަރުހީބެއް ލިބޭކަމަށެވެ. އެގޮތުން މިހާތަނަށް އައިރިއު 800 އަށް ވުރެ ގިނަ މީހުން އެކްސްޕޯއަށް ޒިޔާރަތްކޮށްފައިވާކަމަށް އޭނާ ވިދާޅުވިއެވެ. މިފަދަ އެކްސްޕޯއެއްގެ ސަބަބުން ޞިއްޙީ ޚިދްމަތްދޭ ތަންތަނުން ފޯރުކޮށްދޭ ޚިދުމަތްތަކުގެ މައުލޫމާތު ރައްޔިތުންނަށް ލިބި ޚިދްމަތް ލިބިގަތުމުގައި ލުއި ފަސޭހެވެގެންދާނެކަމަށް ޖަލީލު ވިދާޅުވިއެވެ.
މޯލްޑިވްސް މެޑިކަލް އެންޑް ހެލްތު އެކްސްޕޯ ދަރުބާރުގޭގައި ކުރިއަށްދާނީ ކޮންމެ ދުވަހަކު ހަވީރު 4 އަކުން ރޭގަނޑު 11 އަށެވެ. އަދި އެކްސްޕޯ ކުރިއަށްދާނީ މި މަހުގެ 20 ވަނަ ދުވަހުގެ ނިޔަލަށެވެ.
މޯލްޑިވްސް މެޑިކަލް އެންޑް ހެލްތު އެކްސްޕޯގައި ޞިއްޙީ ޚިދްމަތް ދެމުން އަންނަ 18 ތަނަކުން މި ފަހަރު ބައިވެރިވިއެވެ.
- އެކްސްޕޯގައި ބައިވެރިވި ބައެއް ފަރާތްތައް:
- އާސިރިީ ހޯލްޑިންގްސް
- ލަންކާ ހޮސްޕިޓަލްސް
- އެމްވީ މެޑިކަލްސް ފްރައިވެޓް ލިމިޓެޑް
- ސޮސައިޓީ ފޯ ހެލްތް އެޑިއުކޭޝަން
- ހެލްތް ޕްރޮޓެކްޝަން އޭޖެންސީ
- މޯލްޑިވްސް ފުޑް އެންޑް ޑްރަގް އޮތޯރިޓީ
- ދަމަނަވެށި
- އިންޑިގޯ
- ސަމަދު ފަރޓިލިޓީ އެންޑް މެޓާނިޓީ ހޮސްޕިޓަލްސް
- ޑާޑަންސް ހޮސްޕިޓަލް
- އެސްޓަރ މިމްސް ކޮއްޓަކަލް
- ފިޓްޒޯން
- ފިޒިކަލް ފިޓްނަސް ސެންޓަރ
- ވިލާ ކޮލެޖް
އެކްސްޕޯގައި ބައިވެރިިވި ފަރާތްތަކުން ބުނީ މިއީ ވަރަށް މުހިންމު އެކްސްޕޯއެއް ކަމަށާއި އެކްސްޕޯގެ ތެރެއިން އެ ތަންތަނުން ފޯރުކޮށްދޭ ޚިދުމަތްތަކާއި ބެހޭ ތަފުޞީލީ މަޢުލޫމާތެއް ލިބިގެންދާނެ ކަމަށެވެ.
މިއީ އެމްވީ މެޑިކަލްސްއިން އިންތިޒާމުކޮށްގެން ކުރިއަށްގެންދާ ސިއްޙީ ދާއިރައާގުޅޭ އެންމެ ބޮޑު ހެލްތު އެގްޒިބިޝަނެވެ. މިއީ މި އެކްސްޕޯ ބާއްވާ 3 ވަނަ ފަހަރެވެ.
