ހުޅުމާލޭގައި 6 ބުރީގެ އޮފީސް ޢިމާރާތެއްގެ މަސައްކަތް ކޮށްދޭނެ ފަރާތެއް ހޯދުމަށް އިއުލާންކޮށްފި އެވެ.

ފިނޭންސް މިނިސްޓްރީން ކުރި އިއުލާނެއްގައި ބުނެފައިވަނީ މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރގެ އެދިލެއްވުމުގެ މަތިން އީ.ޕީ.ސީ ޓަރންކީ އުޞޫލުން ހުޅުމާލޭގައި އޮފީސް ޢިމާރާތެއްގެ މަސައްކަތް ކޮށްދޭނެ ފަރާތެއް ހޯދަން ބޭނުންވާ ކަމަށެވެ. އެހެންކަމުން މަސައްކަތަށް ބީލަން ހުށަހެޅުމުގެ ދަޢުވަތު އެކަމަށް ޝަރުޠުހަމަވާ ރާއްޖެއާއި ރާއްޖޭންބޭރުގެ ފަރާތްތަކަށް ހުޅުވާލައިފައިވާ ކަމަށް އިއުލާންގައި ބުނެފައިވެއެވެ. އަދި ބީލަން ހުޅުވުން އޮންނާނީ 24 ޖޫން 2019 ވާ ހޯމަ ދުވަހުގެ 11:00ގައި ކަމަށް ވެސް އިއުލާންގައި ބުނެފައިވެއެވެ.

ފިނޭންސް މިނިސްޓްރީން ބުނި ގޮތުގައި މަސައްކަތަށް ޝަރުޠުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަރނޭޝަނަލް ކޮމްޕެޓިޓިވް ބިޑިންގ (އައި.ސީ.ބީ) އުޞޫލުގެ މަތިންނެވެ.

އިއުލާންގައި ބުނެފައިވާގޮތުން ބިޑް ސެކިޔުރިޓީގެ ގޮތުގައި1,000,000.00ދިވެހި ރުފިޔާ (އެއް މިލިއަން ދިވެހި ރުފިޔާ ނުވަތަ އެ ޢަދަދާ އެއްވަރެއްގެ ޢަދަދެއްގެ ޔޫ.އެސް ޑޮލަރުން)ހުށަހަޅުއްވާނެ ކަމަށެވެ. އަދި ބިޑް ސެކިޔުރިޓީގެ މުއްދަތަކީ ބިޑް ހުޅުވާ ތާރީޚުން ފެށިގެން 148 ދުވަސް ކަމަށް އިއުލާންގައި ބުނެފައިވެއެވެ.

އިމާރާތުގެ ކުރެހުމުގައިވާގޮތުން އެއީ 6 ބުރީގެ އިމާރާތަކެވެ. އަދި އެ އިމާރަތް އެޅުމަށް ނިންމާފައިވަނީ ޓްރީޓޮޕް ހޮސްޕިޓަލްގެ ފުރަގަހަށްވާގޮތަށް އޮންނަ ހުސް ބިމުގަ އެވެ.

ރައީސް އިބްރާހިމް މުހައްމަދު ސޯލިހް ނިންމާފައިވަނީ މާލޭގައި ސަރުކާރުގެ ބޮޑު އެއްވެސް އިމާރާތެއް ނޭޅުމަށެވެ. އެހެންކަމުން ސަރުކާރުގެ އޮފީސްތަކުގެ އައު އިމާރަތްތައް ވެސް ބަދަލުކުރަމުންދަނީ ހުޅުމާލެއަށެވެ.