ހޮނިހިރު ދުވަހު ބޭއްވި އިންތިހާބަކީ މިހާތަނަށް ރާއްޖޭގައި މަޖިލިސް އިންތިހާބެއްގައި އެންމެ ގިނަ ބަޔަކު ވޯޓުލީ އިންތިހާބު ކަމަށް އިލެކްޝަންސް ކޮމިޝަނުގެ ރައީސް އަހުމަދު ޝަރީފް ވިދާޅުވެއްޖެއެވެ.
އާދިއްތަ ދުވަހު ޝަރީފް ކުރެއްވި ޓްވީޓެއްގައި ވިދާޅުވީ، މި އިންތިހާބުގައި 212،079 މީހުން ވޯޓުލާފައިވާ ކަމަށާއި، މިއީ މަޖިލިސް އިންތިހާބެއްގައި އެންމެ ގިނަ ބަޔަކު ވޯޓުލީ ފަހަރު ކަމަށެވެ.
212079 mi inthikhaab ga vote li, mee parliament inthikhaabehga ehmen gina baeh vote li faharu
— Ahmed Shareef (@ShareefRangondi) April 7, 2019
ޝަރީފް އެހެން ވިދާޅުވެފައިވާއިރު، 2009 ވަނަ އަހަރު ވޯޓު ލުމުގެ ހައްޤު 212،559 ފަރާތަކަށް ލިބިފައިވާއިރު، އޭގެ ތެރެއިން ވޯޓު ލާފައި ވަނީ 166،105 މީހުންނެވެ. އެއީ 78.15 އިންސައްތަ މީހުންނެވެ. އަދި 2014 ވަނަ އަހަރު 240،652 މީހުންނަށް ވޯޓުލުމުގެ ހައްޤު ލިބިފައިވާއިރު، އޭގެ ތެރެއިން ވޯޓުލާފައި ވަނީ 189،642 މީހުންނެވެ. އެއީ 78.8 އިންސައްތަ މީހުންނެވެ.
މިއަހަރު މަޖިލިސް އިންތިހާބުގައި 264،442 މީހަކަށް ވޯޓު ލުމުގެ ހައްޤު ލިބިފައިވާއިރު، އޭގެ ތެރެއިން ވޯޓު ލާފައިވަނީ 212،079 މީހުންނެވެ. އެއީ 80.19 އިންސައްތަ މީހުންނެވެ.
މި ފަހަރުގެ މަޖިލިސް އިންތިހާބުގެ ނަތީޖާތައް ދައްކާ ގޮތުން ސަރުކާރު ހިންގާ މައި ޕާޓީ (އެމްޑީޕީ) އިން ވަނީ ބޮޑު އަގުލަބިއްޔަތަކުން މަޖިލީހުގެ މެޖޯރިޓީ ހޯދާފައެވެ. ވަގުތީ ނަތީޖާތައް ދައްކާ ގޮތުން އެމްޑީޕީ އަށް 60 އަށް ވުރެ ގިން ގޮނޑި ވަނީ ލިބިފައެވެ.
