ރާއްޖޭގެ އިކޮނޮމިކް ޒޯން 24 ގަޑިއިރު ބެލެހެއްޓޭނެ ޤާބިލްކަން ވަރަށް އަވަހަށް އަސްކަރިއްޔާގައި ޤާއިމްކުރެވޭނެކަމަށް ރައީސް ޑރ.މުހައްމަދު މުއިއްޒު ވިދާޅުވެއްޖެއެވެ.

އެމަނިކުފާނު އެފަދައިން ވިދާޅުވީ ރިޔާސީ ބަޔާނުގައި ޤައުމުގެ ހާލަތު ބަޔާންކޮށްދެއްވަމުންނެވެ.

ރައީސް ވަނީ ރާއްޖޭގެ ދިފާއީ ބާރުގެ ހަކަތަ އިތުރުކުރުމާއި މެދު ވާހަކަފުޅު ދައްކަވާފައެވެ. އެގޮތުން އެމަނިކުފާނު ޤަބޫލުކުރައްވާ ގޮތުގައި އެއްގަމާއި، ކަނޑާއި، ވައިގެމަގުން ޤައުމު ދިފާޢުކުރެވޭނެ ޒަމާނީ ޢަސްކަރީ ޤާބިލުކަން ދިވެހިރާއްޖޭގެ ކިބައިގައި ހުރުން މުހިންމު ކަމަށް ރައީސް ވަނީ ވިދާޅުވެފައެވެ. އަދި އަސްކަރީ ޤާބިލްކަން ވަރުގަދަކުރަން ޖެހޭ ކަމަށާއި އެ މަސައްކަތްތައް މިހާރު ކުރަމުންދާ ކަމަށް ރައީސް ވަނީ ވިދާޅުވެފައެވެ.

ރައީސް ވިދާޅުވީ ރާއްޖޭގެ 900،000 އަކަކިލޯމީޓަރުގެ ބޮޑު އެކްސްކްލޫޒިވް އިކޮނޮމިކް ޒޯން 24 ގަޑިއިރު މެދުކެނޑުމެއް ނެތި ބެލެހެއްޓޭނެ ޤާބިލްކަން ދާދި އަވަހަށް ދިވެހި އަސްކަރިއްޔާގައި ޤާއިމް ކުރެވިގެންދާނެ ކަމަށެވެ.

ރައީސް އިތުރަށް ވިދާޅުވީ އެމަނިކުފާނު އެންމެ އިސްކަމެއް ދެއްވާނެ އެއްކަމަކީ ޤައުމުގެ މިނިވަންކަމާއި އިސްތިޤްލާލު ރައްކާތެރިކުރުން ކަމަށެވެ. އެގޮތުން ޤައުމުގެ ކަންކަން ހިންގުމުގައި ހިފަހައްޓާނެ އެންމެ މައިގަނޑު އުޞޫލަކީ ވެސް އެއީކަމަށް އެމަނިކުފާނު ވަނީ ވިދާޅުވެފައެވެ.

ރައީސް ޑރ މުއިއްޒު ވިދާޅުވި ގޮތުގައި ދިވެހި ޤައުމިއްޔަތުގެ ބަހާތަކަށް ސަރުކާރުން ޚާއްޞަ ސަމާލުކަމެއް ދޭނެއެވެ. މިގޮތުން، މާތްވެގެންވާ އިސްލާމްދީނުގެ މަތިވެރި އުޞޫލުތައް ނަގަހައްޓައި، ރިވެތި އަހުލާގާ ސުލޫކު މުޖްތަމަޢުގައި އަށަގެންނެވުމަށް މުހިންމު މަސައްކަތްތަކެއް ފަށާފައިވާ ކަމަށް ވިދާޅުވިއެވެ.