ތާޖް މަހަލް އިން ނަގާ ފީ އިންޑިއާ އިން ބޮޑުކޮށްފިއެވެ.

ކުރިން އިންޑިއާގެ ރައްޔިތުންނަށް ތާޖް މަހަލް އަށް 50 ރުޕީސްގެ ފީއެއް ދީގެން ވަދެވުނު ނަމަވެސް މިހާރު ވަދެވެނީ 250 ރުޕީސް ދައްކައިގެންނެވެ. އަދި އެތަނަށް ޒިޔާރަތް ކުރާ ފަތުރުވެރިން އަތުން ނަގާ ފީވެސް ވަނީ ބޮޑު ކޮށްފައެވެ. ފަތުރުވެރިންގެ އަތުން ނަގަން ނިންމާފައިވަނީ 1100 ރުޕީސްއެވެ.

އިންޑިއާއިން ބުނީ ކޮންމެ ޤައުމަކަށް ނިސްބަތްވާ ކުއްޖަކަށްވީ ނަމަވެސް އުމުރުން 15 އަހަރަށްވުރެ ދަށް ކަމުގައިވާ ނަމަ އެއްވެސް ފީއެއް ނުނަގާނެ ކަމަށެވެ. އިންޑިއާ ސަރުކާރުން ބުނެފައިވަނީ ތާޖް މަހަލް އިން ނަގާ ފީ ބޮޑު ކުރަން ނިންމީ ފަތުރުވެރިން ޒިޔާރަތްކުރާ އަދަދު އިތުރުވުމާއި ގުޅިގެން ކަމަށެވެ.

ތާޖް މަހަލް އިމާރާތްކޮށްފައިވަނީ 17 ވަނަ ގަރުނުގެ ތެރޭގައި އިންޑިއާގައި ވެރިކަން ކުރެއްވި ޝާހު ޖަހާނެވެ.

މި މަގުބަރާއަކީ އޭނާގެ އެންމެ ލޯބިކުރެއްވި އަނބިކަނބަލުން މުމްތާޒް މަހަލްގެ ހަނދާނުގައި އިމާރާތްކުރި ޒިޔާރަތެކެވެ. ތާޖުމަހަލް ހަދާފައިވަނީ ހާއްސަ ހިލައެއް ބޭނުންކޮށްގެނެވެ. އެ ހިލައިގެ އަޖަބަކީ ހެނދުނު ފިޔާތޮށިކުލައިގައި ހުރެފައި، މެންދުރު ފަހު ހުދުކުލައަށް ބަދަލުވެފައި ހަވީރު ކިރު ކުލައަށް ބަދަލުވުމެވެ.

ތާޖް މަހަލް އަކީ ފަތުރުވެރިންގެ މެދުގައި ވަރަށް މަޤްބޫލް ތަނެކެވެ. ތަފާސް ހިސާބުތަކުން ދައްކާ ގޮތުގައި އެތަނަކަށް އަހަރެއްގެ މައްޗަށް 7 މިލިއަނަށް ވުރެ ގިނަ ފަރާތްތަކުން ޒިޔާރަތްކުރެއެވެ.