މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސިސީ) އިން ކަށަވަރު ޕްރޮމޯޝަން ފަށައިފިއެވެ.

މި ޕްރޮމޯޝަން ކުރިއަށްދާނީ ޑިސެމްބަރު މަހުގެ 8 ވަނަ ދުވަހުން ފެށިގެން ޖެނުއަރީ މަހުގެ 10 ވަނަ ދުވަހާއި ހަމައަށެވެ.

އެމްޓީސީސީން ބުނީ މިއަހަރު މި ޕްރޮމޯޝަންގައި އަމާޒުކޮށްފައިވަނީ ސުޒުކީ އައުޓްބޯޑް އިންޖީނާއި ޔަންމާ އިންބޯޑް އިންޖީނަށް ކަމަށެވެ.

އެމްޓީސީސީގެ ޖެނެރަލް މެނެޖަރ އިސްމާއިލް އަދުހަމް ވިދާޅުވީ ސުޒުކީ އިންޖީނުތަކުން 5 އިންސައްތައާ 16 އިންސައްތައާ ދެމެދުގެ ޑިސްކައުންޓެއް ލިބޭނެ ކަމަށެވެ. އަދި ޔަންމާގެ ދެ މޮޑެލްއެއް ކަމަށްވާ 170 އާއި 210 ގެ ހޯސްޕަވަރުގެ އިންޖީނުން ވެސް ބޮޑެތި ޑިސްކައުންޓް ތަކެއް ލިބިގެންދާނެ ކަމަށް އަދުހަމް ވިދާޅުވިއެވެ. އިންޖީނުގެ އިތުރުން ސުޒުކީ އާއި ޔަންމާގެ މެއިންޓެނެންސް ކިޓްތައްވެސް މިޕްރޮމޯޝަންގައި ހިމެނޭއިރު މި މެއިންޓެނެސް ކިޓްތަކުން 38 އިންސައްތަ އާއި ހަމައަށް ޑިސްކައުންޓް ލިބިގެންދާނެ ކަމަށް އަދުހަމް ފާހަގަކުރެއްވިއެވެ.

އެމްޓީސީސީން ވަނީ މި އަހަރުގެ ކުރީ ކޮޅު "ސާބަސް" ގެ ނަމުގައި ޕްރޮމޯޝަނެއް ހިންގާފައެވެ. މި ޕްރޮމޯޝަންއަށް އާންމުންގެ ފަރާތުން ބޮޑު ތަރުހީބެއް ލިބިފައިވާއިރު މި ޕްރޮމޯޝަންގެ ދަށުން އެމްޓީސީސީ ކަށަވަރު ޝޯރޫމުން ވިއްކާ ޔަންމާ ބްރޭންޑްގެ ޖަނަރޭޓަރުގެ އެކި މޮޑެލްތައް ވަރަށް ޙާއްސަ ޑިސްކައުންޓްތަކާއެކު ލިބުމުގެ ފުރުސަތު ކަސްޓަމަރުންނަށް ވަނީ ހުޅުވާލާފައެވެ.

އެމްޓީސީސީ އިން ބުނީ އެކުންފުނީގެ އަމާޒަކީ އަބަދުވެސް ކަސްޓަމަރުންނަށް ލުއި ފަސޭހަ ގޮތްތައް ހޯދައިދިނުން ކަމަށެވެ. އެގޮތުން ކޮންމެ އަހަރަކު ވެސް އެކި ޕްރޮޑަކްޓްތަކުން ކަސްޓަމަރުންނަށް ލުއިފަސޭހަ ޕްރޮމޯޝަންތައް ބޭއްވުމާއި، ރާއްޖޭގެ އެކި ކަންކޮޅުތަކުގައި ތިބި އެމްޓީސީސީގެ ކަސްޓަމަރުންނާ ބައްދަލުކޮށް ޓްރެއިނިންގ އަދި މައުލޫމާތު ދިނުމުގެ ހަރަކާތްތައް އެކުންފުނިން އަބަދުވެސް ރާވާ ހިންގަމުން ދާކަމަށް އެމްޓީސީސީން ބުނެއެވެ.

އެމްޓީސީސީން "ކަށަވަރު ޕްރޮމޯޝަން" ބާއްވާ މިއީ ހަތަރު ވަނަ އަހަރެވެ.