ސެނޭޓްގެ ހަނި އަޣުލަބިއްޔަތަކުން ފަނޑިޔާރުކަމަށް ރުހުން ލިބިވަޑައިގެންނެވުމާއެކު ބްރެޓް ކެވަނައު އެމެރިކާގެ ސުޕްރީމް ކޯޓުގެ 114ވަނަ ފަނޑިޔާރުގެ ގޮތުގައި ހުވާ ކުރައްވައިފިއެވެ.

ކެވަނައު އަށް ރުހުންދިނުމުގައި ރިޕަބްލަކަނުންނާއި ޑެމޮކްރޭޓުން ވަނީ، ކެވަނައުގެ މައްޗަށް ކުރެވުނު ޖިންސީ ގޯނާގެ ތުހުމަތާއެކު ބޮޑު ޚިޔާލު ތަފާތުވުމަކަށް ގޮސްފައެވެ. ކެވަނައު ވަނީ އެ ތުހުމަތު ދޮގުކުރައްވާފައެވެ.

ސެެނޭޓްގެ މެމްބަރުންގެ ތެެރެއިން 50 މެމްބަރަކު ކެވަނައުއަށް އާނބަސް ބުނެފައިވާއިރު 48 މެމްބަރަކު ދެކޮޅު ހައްދަވާފައިވެއެވެ. ރިޕަބްލިކަން ޕާޓީއަށް ނިސްބަތްވެވަޑައިގަންނަވާ ލީސާ މަރްކޯވސްކީ ކެވަނައު އައްޔަން ކުރެއްވުމަށް ދެކޮޅު ހެއްދެވި ނަމަވެސް ރިޕަބްލިކަން އަށް ނިސްބަތްވެ ވަޑައިގަންނަވާ އަދި މޮންޓާނާގެ އެހެން މެމްބަރެއްކަމަށްވާ ސްޓީވަން ޑެއިނެސް އެ މަނިކުފާނުގެ ދަރިކަނބަލެއްގެ ކައިވެނި އޮތުމުން ރަށުގައި ނޫޅުއްވާތީ ބަދަލުގައި ދެއްވާ ވޯޓެއްގެ ގޮތުގައި ވޯޓް ދެއްވިއެވެ.

ސްޓީވަން ޑެއިނެސްއަކީ ކެވަނައު އައްޔަން ކުރެއްވުމަށް ތާއީދުކުރައްްވާ ބޭފުޅެެކެވެ.

ކެވަނައުގެ ނަން ސެނޭޓުން ފާސްކުރުން ވެގެންދާނީ ރައީސް ޑޮނަލްޑް ޓްރަމްޕްއަށް ލިބިވަޑައިގެންނެވި ބޮޑު ކާމިޔާބަކަށެވެ.

ކެވަނައު މަގާމަށް އައްޔަން ކުރެވުމާއެކު ރައީސް ޑޮނަލްޑް ޓްރަމްޕް ވަނީ ސެނޭޓަށް މަރުހަބާ ވިދާޅުވެފައެވެ.

ރިޕަބްލިކަން ޕާޓީގެ އެންމެ މެމްބަރަކު ދެކޮޅު ހައްދަވާފައިވާއިރު ޑެމޮކްރޭޓުންގެ ތެރެއިން ކެވަނައުއަށް ވޯޓް ދެއްވާފައިވަނީ އެންމެ މެމްބަރެކެވެ.

އެމެރިކާގެ ސުޕްރީމް ކޯޓުގެ ފަޑިޔާރުކަމަށް ބޭފުޅަކު އައްޔަންކުރަނީ ރިޓަޔަރ ކުރެއްވި ފަނޑިޔާރު އެންތޮނީ ކެނެޑީގެ ބަދަލުގައެވެ.

އެންތޮނީ ކެނެޑީއަކީ ކޮންޒަވެޓިވް ވިސްނުންފުޅުގެ ބޭފުޅަކަށްވާއިރު ބޮޑެތި މައްސަލަތަކުގައި އެމަނިކުފާނުގެ ވޯޓް ބަދަލުކުރައްވާފައިވެއެވެ.

ނިކޮށް ސުޕްރީމް ކޯޓަށް ޓްރަމްޕް ހޮއްވެވި ކެވަނައު އަކީ ކުރީގެ ރައީސް ޖޯޖް ޑަބްލިއު ބުޝްގެ މުޝީރެއްގެ ގޮތުގައި ވެސް މަސައްކަތް ކުރެއްވި ބޭފުޅެކެވެ.

ކެވަނައު އައްޔަން ކުރުން ދެތިން ހަފްތާއަށް ލަސްވެގެން ދިޔައީ ކެލިފޯނިއާގައި ސައިކޮލޮޖީ ލެކްޗަރަރއެއްގެ ގޮތުގައި މަސައްކަތްކުރައްވާ ޕްރޮފެސަރ ކްރިސްޓީން ބްލޭސީ ކެވަނައުގެ މައްޗަށް ކޮށްފައިވާ ރޭޕްގެ ތުހުމަތާއި ގުޅިގެންނެވެ

އޭނާ ވަނީ މީގެ 36 އަހަރު ކުރިން ހިނގާފައިވާ އެ ހާދިސާގެ ސަބަބުން އޭނާގެ މުޅި ދިރިއުޅުން ބަދަލުވެގެންދިޔަ ކަމަށް ބުނެފައެވެ.

ބްލޭސީ ތުހުމަތުކުރަނީ 1982 ވަނަ އަހަރު ވޮޝިންގޓަންގައި ކެވަނައު އާއި އޭނާ އާއި ދެ މީހުންގެ ފުރާވަރުގެ އުމުރުގައި އުޅުނުއިރު ކެވަނައު މަސްތުގެ ހާލުގައި ހުރެ އޭނާގެ ހެދުން ބާލުވަން މަސައްކަތްކޮށްފައިވާ ކަމަށެވެ.

ބްލޭސީ ބުނެފައި ވަނީ އެނދުމައްޗަށް އޭނާ ވައްޓާލުމަށް ފަހު ހަޅޭއްލަވަން އުޅުމުން ކެވަނައު އޭނާގެ އަނގަމަތީގައި އަތްއަޅާފައިވާ ކަމަށެވެ.

އުމުރުފުޅުން 53 އަހަރުފުޅުގެ ކެވަނައު ވަނީ އެ ތުހުމަތަކީ ކަނޑައެޅިގެން ދޮގެއް ކަމަށް ވިދާޅުވެފައެވެ.

އެ މައްސަލައިގައި ކެވަނައު އާ ބްލޭސީވެސް ވަނީ ސެނޭޓްގެ ޖުޑީޝަލް ކޮމިޓީގައި ވަރަށް ޖަޒުބާތީ ބަޔާންތަކެއް ދެއްވާފައެވެ.

އޭގެފަހުން އެފްބީއައިގެ ތަހުުގީގެއް ހިންގާފައި ވެއެވެ.