ލީބިޔާގެ ވެރިރަށް ޓްރިޕޮލީގެ އުތުރުގެ އިދިކޮޅު ހަނގުރާމަވެރިންނާއެކު ސުލްހައިގެ އެއްބަސްވުމެއް ގާއިމް ކުރެވިއްޖެކަމަށް ލީބިއާގެ ސަރުކާރުން ބުނެފިއެވެ.

ބައިނަލްއަގްވާމީ މުޖްތަމައުން ބަލައިގަނެފައިވާ ލީބިއާގެ ސަރުކާރުން ބުދަ ދުވަހު ނެރުނު ބަޔާނުގައި ބުނީ ޓްރިޕޮލީގެ ބޭރުގައި އޮންނަ ތަރްހުނާ އަވަށުގެ ހަނގުރާމަވެރިންނާއެކު ސުލްހައިގެ އެއްބަސް ވުމެއް އެކުލަވާލައި ސޮއިކޮށްފައިވާ ކަމަށެވެ. އެއާއެކު އެ ސަރަހައްދު އަމާންވާނޭކަމުގެ ޔަގީންކަން ސަރުކާރުން ވަނީ ދީފައެވެ.

ވެރިރަށް ޓްރިޕޮލީގެ އުތުރުގައި އެންމެ ފަހުން ހަމަނުޖެހުމެއް ހިނގާފައި ވަނީ އޮގަސްޓް 26 ގައެވެ. އެފަހަރު ވެސް 100 އަށް ވުރެ ގިނަ މީހުން ވަނީ މަރުވެފައެވެ.

ނޭޓޯގެ ގައުމުންތައް ގުޅިގެން 2011 ވަނަ އަހަރު ލީބިޔާގެ ގައްޒާފީ ވެރިކަމުން ވައްޓާލިފަހުން އެގައުމުގެ ވެރިރަށް ވެފައި ވަނީ ހަނގުރާމައިގެ މައި މައިދާނެވެ.