އިންޑޮނީޝިއާގެ ސުލަވެސީއަށް އައި ބިންހެލުމާއި އެއާއި ގުޅިގެން އެރި ސުނާމީގައި މަރުވި މީހުންގެ އަދަދު 832 އަށް އަރާފައިވާކަމަށް އެ ގައުމުގެ ޑިޒާސްޓަރ މިޓިގޭޝަން އޭޖެންސީއިން ބުނެފިއެވެ.

އެ އިދާރާއިން ބުނީ ސުނާމީގައި ގެއްލުން ލިބިފައިވަނީ ކުރިން އަންދާޒާ ކުރެވުނު ވަރަށް ވުރެވެސް ބޮޑަށް ކަމަށެވެ.

ރިޕޯޓްތައް ބުނާ ގޮތުން އެތައް ބަޔަކު ވަނީ ވެއްޓިފައިވާ އިމާރާތްތަކުގެ ދަށުގައެވެ. ހުކުރު ދުވަހު 7.5 މެގްނިޓިއުޑްގައި އައި ބިންހެލުމަށް ފަހު އައި ސުނާމީގެ ރާޅުތައް 6 މީޓަރަށް (20) އަރާކަމަަށް ސުޓޯޕޯ ޕުރުވޯ ވިދާޅުވިއެވެ.

ގަސްތައް ބިމާހަމަވެ ކާރުތައް ފުށުންޖެހި ގެތައް ފުނޑުފުނޑުވެފައިވެއެެވެ.

އިންޑޮނީޝިއާގެ ރައީސް ޖޯކޯ ވިޑޯޑޯވަނީ ހާލަތު ބެއްލެވުމަށް ސުލަވެސީއަށް ޒިޔާރަތްކުރައްވާފައެވެ.

ޕާލޫގެ ޓޫރިސްޓް ހޮޓަލަކާއި މޯލްއެއްގެ ދަށުގައި އެތައް ބަޔަކު ތާށިވެފައިވާ ކަމަށް ވެސް ރިިޕޯޓްތައް ބުނެއެވެ.

ރޯއާ ރޯއާ ހޮޓެލްގެ ދަށުން ޒުވާން އަންހެނަކު ދިރި ހުއްޓައިނަގާފައިވެއެވެ. ހޮޓަލުގެ ވެރިފަރާތުން ބުނީ 60 އަކަށް މީހުން ހޮޓަލުގައި ތާށިވެފައިވާކަމަށް ބެލެވޭކަމަށެވެ.