އިޒްރާއީލުގެ ބިން ބޮޑު ކުރުމަށް ފަލަސްތީނުގެ "ޚާން އަލް އަހްމަރް"ގެ ރައްޔިތުންގެ ގެތައް ހުސްކުރުމަށް ހަފްތާއެއްގެ މުއްދަތު ދީފިއެވެ.
އޮކްޓޯބަރު ފުރަތަމަ ދުވަހަށް ފަހު އެ ސަރަހައްދުގެ އެއްވެސް ހިސާބެއްގައި މީހެއްގެ ހިލަމެއް ވެގެންނެއް ނުވާނެ ކަމަށް އިޒްރާއީލުން ބުނެއެވެ. އެ ދުވަހަށް ފަހު ގެތަކުގައި އުޅޭ މީހުން ނެރޭނީ ގަދަ ބާރު ބޭނުންކޮށްގެން ކަމަށް ބުނެ އިޒްރާއީލުން ވަނީ އިންޒާރު ދީފައެވެ. އިޒްރާއީލަކީ ގަދަފަދަ ބާރެއްގެ ގޮތުގައި އެ މީހުން އަމިއްލައަށް ސިފަކުރެއެވެ.
އިޒްރާއީލުގެ ސަލާމަތީ ބާރުތަކުން ވަނީ ގެތައް ހުސްކުރުމުގެ އަމުރު ލިޔުމުން އެ ސަރަހައްދުގެ މީހުންނާ އާދީއްތަ ދުވަހު ހަވާލުކޮށްފައެވެ. ނަމަވެސް އެ ސަރަހައްގެ ރައްޔިތުން ބުނީ އިޒްރާއީލަށް އެއްބާރުލުން ނުދޭނެ ކަމަށެވެ. އެ މީހުން ވަނީ އިޒްރާއީލުން އެ އެންގުން އެންގީ ކޮން ހައިސިއްޔަތަކުންތޯ ސުވާލުކޮށްފައެވެ. މީހަކު ޖަހާހާ ބެރެކަށް އެ މީހުން ނުނަށާނެ ކަމަށާއި ކޮންމެ ފަދަ ހާލެއް ޖެއްސިޔަސް އަމިއްލަ ވަތަން ދޫނުކުރާނެ ކަމަށް އެ މީހުން ބުނެއެވެ.
އިޒްރާއީލުން ބޭނުން ވަނީ އެ ސަރަހައްދުގައި އުޅޭ 180 ވަރަށްކަށް މީހުން ގެތަކުން ހުސްކޮށް، އެ މީހުންގެ ގެތައް ބިމާ ހަމަކޮށްލާ، އެ ބިން އިޒްރާއީލުގެ ބޭނުންތައް ފުދޭ ގޮތަށް ތަރައްގީ ކުރުމަށެވެ.
ގުދުސް އާއި ޑެޑް ސީއާ ދެމެދު އޮންނަ އެ ސަރަހައްދުން މީހުން ނިކުތުމަށް އެންގުމުން ގައުމުތަކުގެ ފާޑު ކިއުން އިޒްރާއީލަށް ވަނީ އަމާޒުވެފައެވެ.
