ފްލޮރިޑާގެ ޖެކްސަންވިލްގެ އެންޓަރޓެއިންމެންޓް ކޮމްޕްލެކްސްއަކަށް އާދީއްތަ ދުވަހު ހަވީރު މީހަކު ބަޑިން ހަމަލާ ދީ ދެ މީހުން މަރާލައިފިކަމަށް ފުލުހުން ބުނެފިއެވެ.

ހަމަލާދިން މީހާގެ ނަމަކީ ޑޭވިޑް ކޭޒް ކަމަށް ފުލުހުން ބުނެފައިވާއިރު އޭނާއަކީ ބަލްޓިމޯރގެ ޒުވާނެއްކަމަށް ފުލުހުންވަނީ ބުނެފައެވެ. އުމުރުން 24 އަހަރުގެ އެ ޒުވާނާވަނީ ބަޑިޖެހުމަށްފަހު އެ ތަނުގައި ހުރެ އަމިއްލަގަޔަށް ބަޑިޖަހައި މަރުވެފައެވެ.

ހާދިސާގައި ތުހުމަތުކުރެވޭ އިތުރު މީހެއް ފެނިފައެއް ނުވެއެވެ. މިހާދިސާގައި 11 މީހަކުވަނީ ޒަޚަމްވެފައެވެ.

މި ހަމަލާ ދީފައިވަނީ، ފިހާރަތަކާއި،ފުޑް ކޯނަރ ތަކާއި މުނިފޫހިފިލުވުމުގެ ހަރަކާތްތައް ކުރިޔަށްގެންދާ ޖެކްސަންވިލީ ލޭންޑިންގައި ވީޑިއޯ ގޭމް މުބާރާތެއް ކުރިޔަށް ގެންދަނިކޮށެވެ.

ކޭޒް ބޭނުންކޮށްފައިވަނީ ވަން ހޭންޑް ގަން އެއްކަަމަށަށް މިހާތަނަށްކުރި ތަހުގީގުން އެނގިފައިވާކަމަށް ފުލުހުން ބުނެއެވެ.

އޭނާ ބަޑިން ހަމަލާދިނީ މުބާރާތުގައި އޭނާ ބަލިވުމުން ނުކުމެ ކަމަށް މީޑިއާ ރިޕޯޓްތަކުގައި ބުނާ ބުނުން ފުލުހުން ކަށަވަރެއް ނުކޮށްދެއެވެ.

މި ފަހުގެ އަހަރުތަކުގައި ފްލޮރިޑާގައި ބަޑީގެ ވަރުގަދަ ހަމަލާތަކެއް ދީފައިވެއެވެ. އޭގެތެރޭގައި އޮލާންޑޯގެ ނައިޓް ކްލަބެއްގައި ހަމަލާދީ 49 މީހުން މަރާލި ހާދިސާއާއި، ޕާކްލޭންޑްގައި ހުންނަ މާޖޮރީ ސްޓޯންމަން ޑަގްލަސް ސްކޫލްގައި މިި އަހަރުގެ ފެބްރުއަރީގައި ހިނގި 17 މީހުން މަރާލި ހާދިސާހިމެނެއެވެ.