މިޔަންމާގެ ލީޑަރު އަން އަންގ ސަން ސޫކީގެ ނަން ކެނެޑާގައި ހުންނަ އިންސާނީ ހައްގުތަކާބެހޭ މިއުޒިއަމުން ނަގައިފިއެވެ.
ސޫކީގެ ނަން އެ މިއުޒިއަމުން ނަގާފައިވަނީ މިދިޔަ އަހަރުގެ ތެރޭގައި ހިނގާދިޔަ، ރޮހިންޖާ މުސްލިމުންނަށް ދިމާވި ލާއިންސާނީ އަނިޔާތަކާއި ގުޅިގެން އެތަކެއް މުސްލިމުންނެއް މަރައި، ގެތައް އަންދައި ބޮޑެތި އަނިޔާތައް ދިން އިރު އެކަމަނާ ހިމޭނުން ހުންނަވައި އެކަމަށް އެކަށީގެންވާ ފިޔަވަޅެއް އަޅުއްވާފައި ނުވާތީއެވެ.
ރޮހިންޖާގައި ހިނގާފައިވާ އިންސާނިއްޔަތާއި ޚިލާފު ކައްތައްތަކުގައި ސޫކީ އެކަށީގެންވާ ފިޔަވަޅު އަޅުއްވާފައި ނުވާއިރު އެކަމަނާއަށް ވަނީ ނޮބެލް ޕީސް ޕްރައިޒް 1991 ވަނަ އަހަރު ލިބިވަޑައިގެންފައެވެ. އެ އެވޯޑަކީ އެގައުމުގައި މިނިވަން އިންސާފުވެރި އިންތިހާބެއް ބޭއްވުމަށް ބާރު އަޅައި ހިންގެވި ހަރަކާތްތަކާއި މިޔަންމާގެ ކުރީގެ މިލިޓަރީ ލީޑަރުންނާ ދެކޮޅަށް ތެދުވެ ސުލްހަވެރިކަމާއެކު ޑިމޮކްރަސީ އަށާއި އިންސާނީ ހައްގުތަކަށް އޭނާ ކުރެއްވި މަސައްކަތުގެ އަގުވަޒަން ކުރުމުގެ ގޮތުން ލިބިވަޑައިގެންނެވި އެވޯޑެކެވެ.
އެހެން ނަމަވެސް އިންސާނިއްޔަތާ ދެކޮޅު ހަމަލާތަކެއް ސޫކީގެ ލީޑަރޝިޕްގައި މިޔަންމާގައި ހިނގާފައިވާތީ އަދި އެކަމާއި ގުޅިގެން އޭރު އެކަށީގެންވާ ފިޔަވަޅެއް އަޅުއްވާފައި ނުވާތީ ދުނިޔޭގެ އެކިކަންކޮޅުތަކުގެ ފާޑުކިޔުން ވަނީ އެކަމަނާއަށް އޭރު އަމާޒުވެފައެވެ.
މިއުޒިއަމްގެ އިސް ފަރާތެއްކަމަށްވާ އެންޖެލީނާ ސާސީ ވިދާޅުވީ ސޫކީގެ ނަން ކެނެޑާގައި ހުންނަ އިންސާނީ ހައްގުތަކާބެހޭ މިއުޒިއަމުން ނަގާފައިވަނީ އިންސާނިއްޔަތާއި ޚިލާފަށް ރޮހިންޖާގައި ހިންގާފައިވާ ލާއިންސާނީ އަމަލުތައް ހިންގި އިރުވެސް އެކަން މަނާކުރުމަށް އެކަމަނާގެ ލީޑަރޝިޕްގައި އެއްވެސް ކަމެއް ކުރައްވާފައި ނުވާތީ ކަމަށެވެ. އެހެންކަމުން އިންސާނިއްޔަތާއި ޚިލާފު އަމަލުތައް ހިންގުވުމުގައި އެކަމަނާ ޝާމިލްވާ ކަމަށް ބަލައި އެ މިއުޒިއަމްގައި އެކަމަނާގެ ނަން ނެގުމަށް ނިންމީ ކަމަށް އޭނާ ވިދާޅުވިއެވެ.
