މަޝްހޫރު ގްރީސްގެ މަޓީ އަވަށުގައި ފެތުރުނު އަލިފާންގަނޑު ކޮންޓްރޯލް ކުރުމަށް ފަހު ދިރިތިބި މީހުން ހޯދަން ފެށި މަސައްކަތް ހުއްޓުމެއްނެތި ކުރިއަށްދާ ކަމަށް ސަލާމަތީ ބާރުތަކުން ބުނެފިއެވެ. އެ ހާދިސާގައި މަރުވި މީހުންގެ އަދަދު ވަނީ 74 އަރާފައެވެ.

ސަރުކާރުން ބުނި ގޮތުގައި ގިނަ މީހުން މަރުވެފައި ވަނީ ވެރިރަށް އެތެންސްގެ އިރުއުތުރުގައި ހިނގި އެ އަލިފާނުގެ ހާދިސާއިން ސަލާމަތްވުމަށް އުޅުމުގެ ތެރޭގައި ކަމަށް ބުނެފައެވެ.

ސަލާމަތްވި މީހުން ބުނީ ގިނަ ބަޔަކު އަލިފާނުން ސަލާމަތްކަން ހޯދަން ދިޔައީ އެ އަވަށާއި ގުޅިފައިވާ މޫދަށް ކަމަށެވެ. އަދި އެއްބަޔަކު މޫދަށް އެރުނުއިރު ފަހަތުން ރޯވެފައިވާ އަލިފާނުގެ ސަބަބުން ބުރަކަށި ވަނީ ފިހިފައި ކަމަށް ވެސް ވަނީ ބުނެފައެވެ.

ގްރީސްގެ ބޮޑުވަޒީރު އެލެކްސިސް ސިޕްރަސް ވަނީ ކުއްލި ހާލަތު އިއުލާންކޮށް، އެމެޖެންސީކޮށް އެހީފޯރުކޮށްދޭ ފަރާތްތަކުގެ މަސައްކަތް ބާރު މިނުގައި ކުރަމުންދާ ކަމަށް ވިދާޅުވެފައެވެ.

ގްރީސްގެ ސަރުކާރުން އެ އަލިފާންގަނޑުނިއްވާފައިވަނީ ޔޫރަޕުގެ އެހީއާއެކުއެވެ. އިޓަލީ، ޖަރުމަނު، ޕޮލެންޑު އަދި ފްރާންސުން ވަނީ އެ އަލިފާން ނިއްވުމަށްޓަކައި ވައިގެ ޒަރިއްޔާއިންނާއި އެހެނިހެން ގޮތްގޮތުން އުޅަނދުތަކާއި ފަޔާފައިޓަރުން ފޮނުވާފައެވެ.

އެ ހާދިސާއަކީ 2007 ވަނަ އަހަރު ގްރީސްގެ ޖަންގަލިތަކުގައި ރޯވެ، 84 މީހަކު މަރުވި ފަހުން އެގައުމުގައި ހިނގި އެންމެ ނުރައްކާތެރި އަލިފާނުގެ ހާދިސާއެވެ.

ސަރުކާރުން ބުނީ އެ ހާދިސާ އަކީ ބަޔަކު ގަސްތުގައި ހިންގި ކަމަކަށް ބެލެވޭ ކަމަށެވެ. ސަބަބަކަށް ސަރުކާރުން ބުނީ އަލިފާން 15 ދިމާލަކުން އެއްވަގުތެއްގައި ފެނިފައިވާތީއެވެ.