އޮސްޓްރޭލިއާގެ ޖަލެއްގައި ހިނގައިދިޔަ ހަމަނުޖެހުންތަކަކަށް ފަހު ފިލައިގެންދިޔަ ތިން ގައިދީ އަކު ހޯދުމުގެ މަސައްކަތް ފުލުހުން ފަށައިފިއެވެ.
ޕަރތުގެ އުތުރުން 400 ކިލޯމީޓަރުގެ ދުރުގައި ހުންނަ ގްރީނަފް ރީޖަނަލް ޕްރިޒަނުން އަންގާރަ ދުވަހު ޖުމްލަ ދިހަ ގައިދީއަކު ފިލާފައިވާ ކަމަށް ފުލުހުން ބުނެއެވެ.
ހަތް މީހުން ހައްޔަރުކޮށްފައިވާއިރު މިހާރު ނުފެނި ވަނީ ތިން ފިރެހެނުންނެވެ.
ކަމާ ބެހޭ އިދާރާތަކުން ވަނީ ފިލާފައިވާ މީހުންނަކީ ލަފާކޮށްލަން ނޭނގޭ ފަދަ ނުރައްކާތެރި ބައެއް ކަމަށް އިންޒާރުދީފައެވެ.
އެ ތިން މީހުންނަނަކީ ކޮންބާވަތެއްގެ ކުށުގައި ޖަލުގައި ތިބި ބައެއްކަން ފުލުހުން ބުނެފައި ނުވާއިރު އެމީހުންނަކީ މީޑިއަމް ސެކިއުރިޓީގައި ތިބި މީހުންނެވެ.
ގައިދީން ފިލާފައި ވަނީ ޖަލުގެ ގޮޅިއެއްގައި ހިނގި އަލިފާނުގެ ހާދިސާއަކަށް ފަހު އަނެއްކާ އަލިފާން ރޯކުރުމަށް ފަހު ކަމަށް ކަރެކްޓިވް ސަރވިސް ކޮމިޝަނަރަ ވިދާޅުވިއެވެ.
ފިލާފައިވާ ގައިދީން ހޯދުމަށް އެ ސަރަހައްދަށް އިތުރު 150 ފުލުހުން ވަނީ ފޮނުވާފައެވެ.
