ރާއްޖޭގެ ބެޑްމިންޓަން ރޭންކިންގެ އެއްވަނައިގައި މިވަގުތު އޮތް ޒަޔާން ޒަކީ ބާކީކޮށް ގައުމީ ބެޑްމިންޓަން ޓީމު މޮރިޝަސްއަށް ފުރައިފިއެވެ.
ގައުމީ ޓީމު މޮރިޝަސްއަށް ފުރާފައިވަނީ މޮރިޝަސް ބެޑްމިންޓަން ސީރީޒްގައި ވާދަކުރުމަށެވެ. މޮރިޝަސްއަށް ދިޔަ ގައުމީ ޓީމުގައި ހިމެނޭ ފިރިހެން ކުޅުންތެރިންނަކީ މުހައްމަދު އަޖުފާނާއި މުހައްމަދު ޝާރިމްގެ އަދި އަހުމަދު ތޯއިފްގެ އިތުރުން ނިބާލް އަހުމަދެވެ. އަންހެން ޓީމުގައި ހިމެނެނީ ނަބީހާ އަބްދުލްރައްޒާގާއި އަދި ނަބާހަ އަބްދުލްރައްޒާގުގެ އިތުރުން އާމިނަތު ޝާހުރުނާޒްއެވެ.
މިފަހަރުގެ ސްކޮޑް ނެގުމުގައި ބަލާފައިވާނީ މާލޭގައި ކުރިޔަށް ގެންދިޔަ ފަރިތަކުރުންތަކަށް ކަމަށް ބެޑްމިންޓަން އެސޯސިއޭޝަނުން ބުނެފައިވެއެވެ.
މިފަހަރުގެ ސްކޮޑުން ޒަޔާން ބޭރުކުރިއިރު މިދިޔަ އަހަރުގެ މުބާރާތުގައި އޭނާ ރާއްޖެއަށް ލޯ މެޑަލް ވެސް ހޯދައިދިނެވެ. މިދިޔަ އަހަރުގެ މުބާރާތުން ރާއްޖެއަށް ދެ މެޑަލް ލިބުނުއިރު ޒަޔާން ވަނީ މިކްސްޑް ޑަބަލްސް އިވެންޓުގެ ޓީމުގައި ހިމެނި ރާއްޖެއަށް ބެޑްމިންޓަން ވޯލްޑް ފެޑެރޭޝަންގެ ސާކިޓް މުބާރާތަކުން ތާރީހުގައި ވެސް ފުރަތަމަ ފަހަރަށް މެޑަލްއެއް ހޯދައިދީފައެވެ. އެފަހަރު ޒަޔާންގެ ޕާޓްނަރެއްގެ ގޮތުގައި ކުޅުނީ މިއަހަރުގެ މުބާރާތަށް ވެސް ދިޔަ ނަބާހާއެވެ.
މިކަމާއި ގުޅިގެން ޒަޔާންގެ އާންމުކޮށްފައިވާ ބަޔާނެއްގައި ވަނީ 2016 ވަނަ އަހަރުން ފެށިގެން މެލޭޝިއާގެ ހައި ޕާފޮމެންސް އެކަޑަމީގައި އޭނާ ތަމްރީންތައް ފުރިހަމަކުރަމުން އަންނަނީ ބެޑްމިންޓަން އެސޯސިއޭޝަންގެ ހުއްދައާއެކު ކަމަށެވެ. ހަމައެހެންމެ އޭނާއަކީ ރާއްޖޭގެ ގައުމީ ބެޑްމިންޓަން ޓީމުގެ ކުޅުންތެރިޔަކަށް ވުމާއެކު އެ އެކަޑަމީއިން އޭނާގެ ހާޒިރީ ރެކޯޑްތައް ރާއްޖޭގެ އެސޯސިއޭޝަނަށް ބަރާބަރަށް ފޮނުވަމުންދާ ކަމަށް ވެސް ޒަޔާން ބުނެފައިވެއެވެ.
ޒަޔާން ބުނީ މޮރިޝަސް އިންޓަނޭޝަނަލް ސީރީޒްއަކީ އަހަރުގެ އެންމެ މުހިންމު މުބާރާތަށްވުމާއެކު އެ މުބާރާތުން ފުރުސަތު ދިނުމަށް ހަތަރު ފަހަރެއްގެ މަތިން އެސޯސިއޭޝަންގައި އެދުނު ކަމަށެވެ. އަމިއްލަ ހަރަދުގައި މުބާރާތުގައި ބައިވެރިވުމަށް އެދުނު ނަމަވެސް އެކަމަށް ވެސް އެސޯސިއޭޝަނުން ހުއްދަ ދީފައިނުވާ ކަމަށް ޒަޔާން ހާމަކޮށްފައިވެއެވެ.
Regarding the upcoming Mauritius International Badminton Tournament. pic.twitter.com/hpISZFfuS8
— Zayan Zaki (@ZayanZaki) June 2, 2018
މި ބަޔާނުގައި ޒަޔާން ބުނީ ޓީމުން އޮޓަމެޓިކް ޖާގައެއް ދިނުމަށް ދުވަހަކު ވެސް އެދިފައިނުވާ ކަމަށާއި އެދުނީ ސެލެކްޝަނެއްގައި ކުޅުމަށް ކަމަށެވެ. އޭނާ ބުނީ އަބަދުވެސް ނަމޫނާއެއްގެ ގޮތުގައި ބަލަމުންދިޔައީ ރާއްޖޭގައި އުފެދުނު އެންމެ މޮޅު އަދި ކާމިޔާބު ބެޑްމިންޓަން ކުޅުންތެރިޔާ ކަމަށާއި އަޖްފާންގެ ކާމިޔާބުގައި ވެސް އެންމެ ބޮޑު ދައުރެއް އަދާކޮށްފައިވަނީ ބޭރުން ހަދާފައިވާ ތަމްރީންތައް ކަމަށް ގަބޫލުކުރާ ކަމަށެވެ. އެހެންކަމުން އޭނާ ވެސް އެދެނީ އަޖުފާން ގޮތަށް ބޭރުގައި ތަމްރީންތައް ކުރިޔަށް ގެންގޮސް ރާއްޖޭގެ ބެޑްމިންޓަންގައި ތަފާތު ދައްކަން ކަމަށް ޒަޔާން ހާމަކޮށްފައިވެއެވެ. މިފަހަރުގެ ޓީމުގައި އަޖްފާނު ވަނީ ހިމަނާފައެވެ.
My statement was made in response to a lot of queries I got regarding the upcoming Mauritius International Tournament. pic.twitter.com/NUpqy05prD
— Zayan Zaki (@ZayanZaki) June 2, 2018
އޭނާ ބުނީ ގަބޫލުކުރެވޭ އެއްވެސް ސަބަބެއް ނެތި މިއަހަރުގެ މުބާރާތުގައި ވާދަކުރުމަށް އޭނާއަށް ފުރުސަތު ނުލިބުމާއި ގުޅިގެން ހިތާމަކުރާ ކަމަށެވެ. އޭނާ ވަނީ ގައުމަށް ރީތި ނަން ހޯދައިދޭން ކުރާ މަސައްކަތް ހުއްޓާނުލާނެ ކަމަށް ބުނެފައެވެ.
މިމަހުގެ ހަތްވަނަ ދުވަހުން ފެށިގެން 10 ވަނަ ދުވަހަށް މޮރިޝަސްގައި ކުރިޔަށްދާ މި މުބާރާތުގައި ރާއްޖޭގެ ޓީމު ވާދަކުރާނީ މިކްސް ޑަބަލްސް އާއި އަންހެން އަދި ފިރިހެން ޑަބަލްސް އިވެންޓްގައެވެ.
