ރައީސް މައުމޫންގެ ހާލުކޮޅު ގޯސްވުމަކީ ދައުލަތުން ސީރިއަސްކޮށް ވިސްނަން ޖެހޭ ކަމެއްކަމަށް ރައްޔިތުންގެ މަޖިލީހުގެ ގަލޮޅު ދެކުނު ދާއިރާގެ މެންބަރު އަޙުމަދު މަޚްލޫފް ވިދާޅުވެއްޖެއެވެ.
ގުޅިފައިވާ ޕާޓީތަކުގެ ތަރުޖަމާންކަންވެސް ކުރައްވާ މަޚްލޫފް މިގޮތައް ވިދާޅުވެފައި މިވަނީ ރައީސް މައުމޫންގެ ހާލުކޮޅު ސީރިއަސްވެ، އެމަނިކުފާނުގެ އަނބިކަނބަލުން މެޑަމް ނަސްރީނާ އިބްރާހީމް ދޫނިދޫއަށް ވަޑައިގެންފައިވާ ކަމަށާއި އެމަނިކުފާނުގެ ގާތުގައި އަބަދުވެސް ފުލުހަކު ބަހައްޓަވާފައިވާކަމުގެ އަޑު އިވިފައި ވަނިކޮށެވެ.
ހޮނިހިރު ދުވަހުގެރޭ މަޚްލޫފް ކުރެއްވި ޓްވީޓެއްގައި ވިދާޅުވީ، ރައީސް މައުމޫންގެ ހާލުކޮޅު ގޯސްވެ އަނބިކަނބަލުން ނަސްރީނާ ދޫނިދޫއަށް ވަޑައިގެންނެވި ވާހަކައަކީ ސީރިއަސްކޮށް ދައުލަތުން ވިސްނަންޖެހޭ ކަމެއް ކަމަށެވެ. އަދި ވަގުތު ފާއިތުވުމުގެ ކުރިން ފިޔަވަޅުއެޅުމަށް ކަމާބެހޭ އިދާރާތަކަށް ގޮވާލާ ކަމަށްވެސް މަޚްލޫފް ވިދާޅުވެފައިވެއެވެ.
Raees Maumoon ge haalukolhu goasve, anbikanbalun Nasreena Dhoonidhoo ah vadaigennevi vaahaka akee seriouskoh dhaulathun visnanjeheykameh. Vaguthu faaithuvumuge kurin fiyavalhu elhumah kamaabehey idhaaraathakah govaalan.
— Ahmed Mahloof (@AhmedMahloof) May 5, 2018
ރައީސް މައުމޫންގެ އަރިހުގައި އަބަދުވެސް މީހަކު ހުންނަން ޖެހޭކަމަށް ޑޮކްޓަރު ލަފާ ދެއްވާފައިވަނީ އެމަނިކުފާނަށް ސިއްހީ މައްސަލައެއްކަމަށްވާ 'ބިނައިން ޕެރޮކްސިސްމަލް ޕޮޒިޝަނަލް ވަރޓިގޯ' (ބީ.ޕީ.ޕީ.ވީ) ޖެހިފައިވާތީއެވެ. މިބައްޔަށް މިދިޔަ ޑިސެމްބަރު މަހުވެސް ރައީސް މައުމޫނަށް ފަރުވާދެއްވާފައިވާކަމަށް އައިޖީއެމްއެޗް ގެ އީއެންޓީ ސްޕެޝަލިސްޓެއް ވިދާޅުވެ، ދެއްވާފައިވާ ލިޔުމެއް އާއިލާއިން ވަނީ ކަމާއި ބެހޭ ފަރާތްތަކާއި ހަވާލުކޮށްފައެވެ.
