ގަމު ތުނޑީ އެމްޑީޕީ ހަރުގޭގައި ހުރި 65 އިންޗީގެ ޓީވީ ހޯމަދުވަހުގެރޭ ދަންވަރުގެ ވަގުތެއްގައި ތަޅާލައިފިއެވެ.

ގަލަކުންޖަހައި ޓީވީ ތަޅައިލީ ކޮން ބައެއް ކަމެއް ނޭނގެއެވެ. އަދި ތުހުމަތު ކުރެވޭ ވަކި ބަޔަކު ވެސް ނެތެވެ. މި މައްސަލަ މިހާރު ވަނީ ފުލުހުންނަށް ހުށަހަޅާފައެވެ.

މިދިޔަ ހުކުރުދުވަހުގެ ރޭ ލ. ގަމުގައި ބޭއްވި ހަފުލާއެއްގައި ގަމުގައި ތިބި ޕީޕީއެމްގެ ގިނަ ޢަދަދެއްގެ މެންބަރުން އެމްޑީޕީ ކޯލިޝަނާ ގުޅި ރައީސް ޔާމީން ހުއްޓުވަން މަސައްކަތް ކުރަން ނިންމުމާ ގުޅިގެން ލ. ގަމު ޕީޕީއެމް މެމްބަރުންގެ މެދުގައި މަސްލަހަތު ގެއްލި ބައިބައިވުން އުފެދިފައިވެއެވެ.

އެމްޑީޕީ ގަމު ދާއިރާގެ ރައީސް މުޙަންމަދު ޝިޔާމް ވިދާޅުވި ގޮތުގައި ކޮންމެ ބަޔަކު ކުރި ކަމެއް ކަމުގައި ވިޔަސް އެއީ ވަރަށް ނާތަހުޒީބު ފިނޑި ޢަމަލެކެވެ. އަދި އެމްޑީޕީ ހަރުގޭގައި ހުރި ޓީވީ ތަޅާލިޔަސް ގަމުގައި ހިންގާ އެމްޑީޕީ ހަރަކާތްތަކެއް ނުހުއްޓުވޭނެ ކަމަށާއި އެމްޑީޕީ ހަރުގެއަށް އާ ޓީވީއެއް ގަތުމަށް މިއަދު ހަވީރު 4:00 ގައި ފަންޑުފޮށި ހުޅުވާނެ ކަމަށް އެފަރާތުން މަޢުލޫމާތު ދެއެވެ.