ދެކުނު އޭޝިއާގެ ޖޫނިއަރ އެންޑް ކެޑޭޓް ޓީޓީ މުބާރާތް އަންނަ ހުކުރު ދުވަހު ފަށާނެ ކަމަށް ޓޭބަލް ޓެނިސް އެސޯސިއޭޝަނުން ބުނެފިއެވެ.
ޓޭބަލް ޓެނިސް އެސޯސިއޭޝަނުން ބުނީ، ދެ ދުވަހުގެ ނިޔަލަށް ބާއްވާ މިމުބާރާތަކީ މިސަރަހައްދުގައި ކުޅެވޭ ޓޭބަލް ޓެނިހުގެ އެންމެ ވާދަވެރި މުބާރާތް ކަމަށާއި އެގޮތުން މިމުބާރާތަށް ވާންޖެހޭ އެންމެ ފަހުގެ ތައްޔާރީތައް ވަރަށް ބާރަށް ކުރިޔަށްދާ ކަމަށެވެ.
ސޯޝަލް ސެންޓަރުގެ އިންޑޯ ހޯލުގައި ކުރިއަށްގެންދިއުމަށް ހަމަޖެހިފައިވާ މިމުބާރާތުގައި ސަރަހައްދީ ހަ ގައުމަކުން ވާދަކުރާއިރު، އެ ގައުމުތަކަކީ ބަންގްލަދޭޝް، އިންޑިއާ، ނޭޕާލް، ޕާކިސްތާން، ސްރީލަންކާ އަދި ދިވެހިރާއްޖެއެވެ.
ޓޭބަލް ޓެނިސް އެސޯސިއޭޝަނުން ބުނީ، މިމުބާރާތުގައި ކުޅުންތެރިންނާއި އޮފިޝަލުން ހިމެނޭ ގޮތަށް ޖުމްލަ 64 ބައިވެރިން މުބާރާތުގައި ރާއްޖެ އައުމަށް ހަމަޖެހިފައިވާ ކަމަށެވެ. ރާއްޖޭގެ ޖޫނިއާ ޓީމް މިމުބާރާތަށް ތައްޔާރުވުމުގެ ގޮތުން މިއަހަރުގެ ފެބުރުއަރީ މަހުން ފެށިގެން އަންނަނީ ތަމްރީންތައް ފުރިހަމަކުރަމުންނެވެ.
