ދިވެހިރާއްޖެ ކޮމަންވެލްތާ އަލުން ގުޅޭނެ ކަމަށް ކުރީގެ ރައީސް މުހައްމަދު ނަޝީދާއި ރައްޔިތުން މަޖިލީހުގެ ކުރީގެ ރައީސް އަބްދުﷲ ޝާހިދު ވިދާޅުވެއްޖެއެވެ.
އިނގިރޭސިވިލާތުގެ ވެރިރަށް ލަންޑަންގައި މިހާރު ފެށުމަށް ތައްޔާރުވެފައިވާ ކޮމަންވެލްތު ޤައުމުތަކުގެ އިސްވެރިންގެ ބައްދަލުވުމާ ދިމާކޮށް ރައީސް ނަޝީދު ހޯމަ ދުވަހު ކުރެއްވި ޓްވީޓެއްގައި ވިދާޅުވީ ދިވެހިރާއްޖެ އަލުން ކޮމަންވެލްތުގެ މެމްބަރު ޤައުމަކަށްވެ، ހަރަކާތްތެރި ދައުރެއް އަދާކުރާނެ ކަމަށެވެ.
The British monarch has always independently represented the Commonwealth, I don’t see why the CW needs a different Head. The Maldives will rejoin the Commonwealth & become an active, reliable and committed member.
— Mohamed Nasheed (@MohamedNasheed) April 16, 2018
މީގެ އިތުރުން ރައީސް ނަޝީދު ވަނީ އިނގިރޭސި ތަޚުތުން އަބަދުވެސް ކޮމަންވެލްތުގެ ޤައުމުތައް ތަމްސީލްކޮށްފައިވާ ކަމަށާއި، އިތުރު ލީޑަރެއް ބޭނުންވާ ސަބަބެއް ފެނިވަޑައިނުގަންނަވާ ކަމަށް ވިދާޅުވެފައެވެ. ރައީސް ނަޝީދު އިޝާރާތްކުރެއްވީ ބެލެވޭ ގޮތުގައި އިނގިރޭސި ރާނީ ކުއީން އެލިޒަބަތު 2 ވަނަ އަށް ފަހު ކޮމަންވެލްތުގެ ލީޑަރަކަށް ވެވަޑައިގަންނަވާނެ ބޭފުޅަކާ މެދު މަޝްވަރާކުރުމަށް އެޖެންޑާކޮށްފައިވާ މައްސަލައަށެވެ.
ރައީސް ނަޝީދުގެ އިތުރުން ރައްޔިތުންގެ މަޖިލީހުގެ ކުރީގެ ރައީސް އަދި ކުރީގެ ޚާރިޖީ ވަޒީރު އަބްދުﷲ ޝާހިދު ވެސް ވިދާޅުވީ ރާއްޖޭގައި ޑިމޮކްރަސީ ޤާއިމް ކުރެވުމުން ކޮމަންވެލްތާ އަލުން ގުޅޭނެ ކަމަށެވެ. އަދި ލަންޑަންގައި އޮތް ކޮމަންވެލްތު ހެޑްސް އޮފް ގަވަރމަންޓް މީޓީންގައި ރާއްޖެ ބައިވެރިނުވާކަމީ ލަދުވެތިކަމެއް ކަމަށް ޝާހިދު ވިދާޅުވިއެވެ.
Utter shame #Maldives is missing out on the #CHOGM2018 in London; Maldives left the #Commonwealth in 2016 when CMAG pressured President Yameen over corruption, and the deteriorating democracy and human rights situation. We will rejoin the #Commonwealth when democracy is restored!
— Abdulla Shahid (@abdulla_shahid) April 17, 2018
ޝާހިދު ވަނީ ރާއްޖެއިން 2016 ވަނަ އަހަރު ކޮމަންވެލްތުން ވަކިވީ ކޮރަޕްޝަނާއި، އިންސާނީ ހައްޤުތަކުގެ މައްސަލަތަކާއި ޑިމޮކްރަސީ ނެތިގެންދާ މައްސަލައިގައި ކޮމަންވެލްތުގެ ފިއްތުންތައް ރާއްޖެއަށް ކުރިމަތިވުމުންކަން ފާހަގަކުރައްވާފައެވެ.
ކޮމަންވެލްތުން މީގެ ކުރިން ވަކިވި ގެމްބިއާ އިން އެޤައުމުގެ ރިޔާސީ އިންތިޚާބުގައި ޑިމޮކްރެޓިކް ވެރިޔަކު އިންތިޚާބު ކުރުމަށް ފަހު އަލުން ކޮމަންވެލްތާ ގުޅި، މިފަހަރުގެ ބައްދަލުވުމުގައި ބައިވެރިވެއެވެ.
ކޮމަންވެލްތު ޤައުމުތަކުގެ ވެރިންގެ ބައްދަލުވުން ކުރިއަށްދަނީ އެޕްރީލް 19-20 އަށް ލަންޑަނުގައެވެ.
