ޓީވީތަކުން ފަހަކަށް އައިސް ދައްކަން ފެށި އިޝްތިހާރެކެވެ. ފެންނަނީ ވިލު ނޫކުލައިގެ ކަނޑުގެ ތެރެއަށް ޕްލާސްޓިކް ދެ ކޮތަޅު ގެނބިގެންދާ މަންޒަރެވެ. ހިތަށް ވަރަށް އަސަރުކުރުވާ ކަހަލަ ގިސްލުމަކުން އެ ކަނޑު އަހަމުންދަނީ "އަހަރެން ރޯ އަޑު އިވޭ ހެއްޔެވެ؟" ނޫނެކެވެ. ކަނޑުގެ އަޑަށް ވުރެ ބާރު ރުއިމެއްގެ އަޑު އަހަންނަށް އެބަ އިވެއެވެ.
ދެންމެ ވިހެއި ދަރިފުޅުގެ ހަޔާތް ބައްޓަންވެގެންދާނެ ގޮތެއް ނޭނގޭތީ، އެ ދަރިފުޅު އުނގަށް ލައިގެން އެއިން މައި މީހާގެ މަޑުމަޑު ގިސްލުމުގެ އަޑެވެ. މުސްތަގުބަލަށް ވާނެ ގޮތެއް ނޭނގި ހުރި ފުރާވަރުގެ ކުއްޖާގެ ހިތުގެ އަޑެވެ. ހަމަ ވިސްނޭ ޒުވާނާ އޭނާގެ ގައުމާ މެދު ހިތާމަކުރާ އަޑެވެ. ދެބައި އުމުރުން ނެއްޓި ޒިންމާތައް ކޮނޑުގައި އަޅައިގެން ހުރި ބައްޕަ އޭނާގެ ވިޔަފާރި ބަންގުރޫޓުވެގެންދާ މަންޒަރު ބަލަން ހުރެ ކަރުނަ އަޅަމުން، ރޮމުން ދާ އަޑެވެ. މުސްކުޅިވެ ބަލި ހާލުގައިވާ ކާފަ އޭނާގެ މާޒީން ލިބުނު ފޮނި އުފާކަން ގެއްލި ގައުމު މިހާލަތަށް ވެއްޓިފައިވާތީ އިރު އިރުކޮޅާ އިއްވާލާ އާހްގެ އަޑެވެ. އެތައް މުއައްޒަފުންނެއް އެމީހުންގެ އަނބިދަރިންނަށް މާދަމާ ކާންދޭނެ އެއްޗެއް ނުލިބިދާނެތީ ރޮމުންދާ އަޑެވެ. ރާއްޖެ އޮތް ހާލަތުން ރިސޯޓްތައް އިނދަޖެހި ގެސްޓްހައުސްތައް ބަންދުކުރަންޖެހިދާނެތީ އެތަނުގެ ވެރިންގެ ގިސްލުމުގެ އަޑެވެ.
އާއެކެވެ! އަހަންނަށް އިވެނީ ގައުމު ރޯއަޑެވެ! ގައުމު ރޮނީ އަދުލު އިންސާފުގެ އުންމީދެއް ވެސް ގައުމުގައި ނެތީތީއެވެ. ޝަރުއީ ދާއިރާގެ އަގު ވެއްޓި އިތުބާރު ގެއްލިފައިވާތީއެވެ. މީގެ ކުރިން ވެސް އެތައް ޝަކުވާއެއް އޮތް ޝަރުއީ ދާއިރާ އަމިއްލަ ފައިދާ އަށް ބަޔަކު ގަސްތުގައި ގަޑުބަޑުކުރީތީއެވެ.
ގައުމު ރޯންފެށީ އިއްޔެއަކު މިއަދު ނޫނެވެ. މާ ކުރިން ވެސް ގައުމު ރޯން ފަށައިފިއެވެ. މި ގައުމު ރޮނީ މިނިވަން ބިމެއްގައި މިނިވަންކަން ނެތި ދިރިއުޅެންޖެހިފައި ވާތީއެވެ. ގާނޫނުތަކުން އެތައް ހައްގުތަކެއް ކަށަވަރުވެ ލިބިފައިވީ ނަމަވެސް އެ ހައްގުތައް ބޭނުންކުރުމުގެ ހައްގުން ބަޔަކު މަހްރޫމްވެފައިވާތީއެވެ. ގައުމަށް ލިބެމުންދާ އާމްދަނީގެ ބޮޑު ބައެއް ވަކި ބައެއް ޖީބަށް ވަދެ ހުސްވާތީއެވެ.
އާއެކެވެ. އަހަންނަށް އިވެނީ ގައުމު ރޯއަޑެވެ. ފެބްރުއަރީ މަހުގެ 1 ވަނަ ދުވަހު ސުޕްރީމް ކޯޓުން ނެރުނު އަމުރު ތަންފީޒުކުރުމަށް ގޮވާލައި ރައްޔިތުން ރޯ އަޑެވެ. އެ އަމުރު ތަންފީޒުކުރުމަށް ސަރުކާރުން ދެކޮޅު ހެދި ހިސާބުން ފެށިގެން މި ގައުމުން ރޯ އަޑު ނުކެނޑެއެވެ. ސަރުކާރުން ބުނަމުން ދަނީ އެއީ ސުޕްރީމް ކޯޓުގެ ދެ ފަނޑިޔާރަކު ރިޝްވަތު ނަގައިގެން ނެރުނު އަމުރެއް ކަމަށެވެ. އެހެންކަމުން ގައުމުގައި ކުއްލި ނުރައްކަލުގެ ހާލަތު އިއުލާނުކޮށް އުއްތަމަ ފަނޑިރާއި އެ ކޯޓުގެ އިތުރު ފަނޑިޔާރަކު ވަނީ ހައްޔަރުކޮށްފައެވެ. ނަމަވެސް އެބުނާ އަމުރެއްފައި އެ ކޯޓުގެ ފަސް ފަނޑިޔާރުން ވަނީ ސޮއިކުރައްވާފައެވެ. މާނައަކީ އެ އަމުރު ނެރުނީ އެންމެ ދެ ފަނޑިޔާރުން ރިޝްވަތު ނަގައިގެންނޭ ބުނުމުގެ ފުރުސަތު ނެތް ކަމެކެވެ. ސުޕްރީމް ކޯޓުން އެއްވެސް ކަމެއް ނިންމޭނީ އަދި އަމުރެއް ވެސް ނެރެވޭނީ އެ ކޯޓުގެ އަގުލަބިއްޔަތުންނެވެ. ދެ ފަނޑިޔާރުންނަކީ އަގުލަބިއްޔަތެއް ނޫނެވެ. އެހެން ކަމަށް ވާ ނަމަ ސަރުކާރުން އެ ބުނާ ގޮތަށް ރިޝްވަތު ނެގީ އެންމެ ދެ ފަނޑިޔާރުންނޭ ބުނެ ނިންމާލެވޭކަށް ނެތެއް ނޫން ހެއްޔެވެ؟ އެ ދެ ފަނޑިޔާރުން ހައްޔަރުކުރުމަށް ފަހު ބާކީ ތިން ފަނޑިޔާރުން ނެރޭ އަމުރުތަކެއް ކަމަށް ބުނެ ކުރިން ނެރުނު އަމުރުގެ ބައިތައް ވަނީ ބާތިލްކޮށްފައެވެ. މިއީ ސަރުކާރުން ބޭނުންވާ ގޮތަށް ނެރެފައިވާ އަމުރުތަކެކެވެ. އެހެންކަމުން ކަން ހިނގަމުންދަނީ ކިހިނެއް ކަމާއި ސުޕްރީމް މި ވަގުތު އޮތީ ކޮން ހާލެއްގައިކަން ދިވެހި ކޮންމެ ރައްޔިތަކަށް ވެސް އެނގެއެވެ. އަސްކަރިއްޔާގެ ބެލުމުގެ ދާށުގައި ސުޕްރީމް ކޯޓު ބާއްވައިގެން ނެރޭ އަމުރެއްގެ ސައްހަކަމާ މެދު ކޮންމެ މީހަކު ވެސް ޝައްކުކުރާނެއެވެ.
އާއެކެވެ. ރައްޔިތުން ރޮނީ އެމީހުން އިންސާފުގެ އުންމީދެއް ވެސް ނެތީތީއެވެ. އިންސާފަކީ އިންސާނާގެ ވުޖޫދުގައިވާ ކަމެކެވެ. އިންސާފު ގެއްލިއްޖެ ނަމަ އިންސާނާ ވުޖޫދުގައި ވުމުގެ އަސްލު ގެއްލުނީއެވެ. ރާއްޖެ މިއަދު އޮތީ އެފަދަ ހާލާތެއްގައެވެ. ގައުމު ރޮނީ މުޅި ގައުމު ވަކި މީހެއްގެ މުށު ތެރޭގައި ފިތި ބާރުވެފައިވާތީއެވެ. ތަންފީޒީ އިދާރާތައް ވަކި މީހަކު ޖަހާހާ ބެރަކަށް ނަށަމުންދާތީއެވެ. މިނިވަން މުއައްސަސާތައް ވާގި ނެތިފައިވާތީއެވެ. ސިޔާސީ ޕާޓީއެއްގެ އޮފީހުގައި ބާއްވާ ޕްރެސް ކޮންފަރެންސްތަކަކުން ފުލުހުންނާއި ސިފައިންނަށް ކޮމާންޑްކުރާތީއެވެ.
މި ފަސްގަނޑު ރޯއަޑު ދިވެހި ރައްޔިތުން އެބަ އަހަންޖެހެއެވެ. މި ގައުމު މިއޮތް ހާލަތުން އެހެން ހާލަތަކަށް ގެންދަން އެބަޖެހެއެވެ. ކޮރަޕްޝަނުގެ ނުބައި ވަބާއިން ތަގައްޔަރުވެފައިވާ މި ގައުމު ސާފުކުރަން އެބަޖެއެވެ. ގާނޫނީ އިމުން ބޭރުވެފައިވާ މި ސަރުކާރު ހަމަމަގަށް އަޅުވަން އެބަޖެހެއެވެ. މުޑުދާރުވެފައިވާ އަދުލު އިންސާފުގެ ދާއިރާ ދޮވެ ސާފުކުރަން އެބަޖެހެއެވެ. ނޫނީ މި ދިވެހި ފަސްގަނޑުން ރުއިމުގެ އަޑު ނުކެނޑޭނެއެވެ. ދިވެހި ރައްޔިތުންގެ އެ ވޭންދެނިވި ގިސްލުމުގެ އަޑު ނުކެނޑޭނެއެވެ.
